અમદાવાદઃ પેટ્રોલ-ડીઝલના ભાવ વધારા બાદ રાજ્‍યમાં CNG અને હાઇબ્રિડ વાહનોની માંગ વધી છે. જાન્‍યુઆરી-ઓગસ્‍ટમાં વેચાણમાં ૨૬ ટકાનો ઉછાળો થયો છે. પેસેન્‍જર વાહનો અને ટુ-વ્‍હીલર બંનેમાં મજબૂત વૃદ્ધિ નોંધાઈ હતી. આ સમયગાળા દરમિયાન, રાજ્‍યમાં ૨.૭ લાખ પેસેન્‍જર વાહનોનું  વેચાણ થયું હતું, જે ૨૦૨૫ના સમાન સમયગાળામાં નોંધાયેલા ૨.૨ લાખ યુનિટ કરતાં વધુ છે. ટુ-વ્‍હીલરનું વેચાણ પણ ૭.૮ લાખથી વધીને ૯.૯ લાખ યુનિટ થયું છે, જે ૨૫.૮% નો વધારો દર્શાવે છે.

સૂત્રોના જણાવ્‍યા પ્રમાણે, ગ્રાહકોની પસંદગીમાં વૈકલ્‍પિક ઇંધણ આધારિત વાહનો તરફ મોટો બદલાવ જોવા મળ્‍યો હતો. આ સમયગાળા દરમિયાન થયેલા કુલ પેસેન્‍જર વાહનોના વેચાણમાંથી લગભગ અડધા વાહનો બિન-પરંપરાગત પાવરટ્રેન ધરાવતા હતા. ઇંધણના વધતા ભાવ અને ક્રૂડ ઓઇલના ભાવમાં અસ્‍થિરતાની ચિતાઓએ ખરીદદારોને પરંપરાગત પેટ્રોલ અને ડીઝલ મોડેલોની સરખામણીએ CNG, હાઇબ્રિડ અને ઇલેક્‍ટ્રિક વાહનો તરફ વધુ આકર્ષ્‍યા છે.

કેન્‍દ્રીય માર્ગ પરિવહન અને રાજમાર્ગ મંત્રાલયના ડેટા મુજબ કુલ પેસેન્‍જર વાહન રજીસ્‍ટ્રેશનમાં પેટ્રોલ અને E20-પેટ્રોલ વાહનોનો હિસ્‍સો ૨૭.૮% હતો, જ્‍યારે ડીઝલ વાહનોનો હિસ્‍સો ૨૧.૭% રહ્યો હતો. બાકીનો મોટો હિસ્‍સો વૈકલ્‍પિક ઇંધણ સેગમેન્‍ટનો હતો.

સૂત્રોએ જણાવ્‍યું હતું કે, EVs હાલમાં બજારનો પ્રમાણમાં નાનો હિસ્‍સો છે, પરંતુ તેમાં દર મહિને સતત વૃદ્ધિ થઈ રહી છે. ભૌગોલિક રાજકીય અનિﾍતિતાઓ વચ્‍ચે ઇંધણના ભાવની ચિતા ખરીદદારોને વૈકલ્‍પિક પાવરટ્રેન પર વિચાર કરવા પ્રેરિત કરી રહી છે. વધુ હાઇબ્રિડ મોડેલો આવવાથી ગ્રાહકો માટે પસંદગીની તકો પણ વધી રહી છે. તેમણે ઉમેર્યું કે ક્રૂડ ઓઇલના ભાવમાં સંભવિત વધારાનો ડર ગ્રાહકોને વૈકલ્‍પિક ઇંધણવાળા વાહનો તરફ દોરી રહ્યો છે. શાહે જણાવ્‍યું હતું કે, મારુતિ અને ટોયોટા જેવા ઉત્‍પાદકો વધુને વધુ હાઇબ્રિડ મોડેલો લોન્‍ચ કરી રહ્યા છે, જે ગ્રાહકોને એક વાસ્‍તવિક વિકલ્‍પ પૂરો પાડે છે.

આ પરિવર્તનમાં CNG વાહનોનું વેચાણ વધ્‍યું છે. પેટ્રોલ-CNG અને પેટ્રોલ E20-CNG મોડેલો મળીને ૧.૦૬ લાખ રજીસ્‍ટ્રેશન નોંધાયા હતા, જે આ સમયગાળા દરમિયાન રજીસ્‍ટર થયેલા તમામ પેસેન્‍જર વાહનોના લગભગ ૩૯% જેટલા છે. હાઇબ્રિડ વાહનોએ ૯,૧૦૧ રજીસ્‍ટ્રેશન નોંધાવ્‍યા હતા, જ્‍યારે પ્‍યોર ઇલેક્‍ટ્રિક, હાઇબ્રિડ ઇલેક્‍ટ્રિક અને બેટરી સંચાલિત વાહનોના મળીને કુલ ૨૧,૮૮૭ રજીસ્‍ટ્રેશન થયા હતા.

સૂત્રો મુજબ, રૂ. ૧૫-૨૦ લાખની પ્રાઇસ કેટેગરીમાં હાઇબ્રિડ વાહનો એક મહત્‍વપૂર્ણ ગ્રોથ સેગમેન્‍ટ તરીકે ઉભરી શકે છે. સુધારેલી ટેકનોલોજી અને નવા, ઇંધણ-કાર્યક્ષમ મોડેલો ગ્રાહકોને બંને પ્રકારના લાભ આપે છે. પરિણામે, હાઇબ્રિડ વાહનોની માંગ વધુ મજબૂત બની રહી છે.  તહેવારોની મોસમ વેચાણને વધુ વેગ આપશે, કારણ કે પરંપરાગત રીતે પરિવારો શુભ મુહૂર્તમાં મોટી ખરીદી કરવાનું પસંદ કરે છે. ટુ-વ્‍હીલરની માંગ પણ મજબૂત રહી હતી અને સમગ્ર સમયગાળા દરમિયાન દર મહિને વાર્ષિક ધોરણે વૃદ્ધિ નોંધાઈ હતી, જેમાં સૌથી વધુ ઉછાળો જાન્‍યુઆરી અને માર્ચ મહિનામાં જોવા મળ્‍યો હતો.

ગુજરાત તહેવારોની ખરીદીની સીઝનમાં પ્રવેશ કરી રહ્યું હોવાથી ઓગસ્‍ટ મહિનાના આંકડા મહત્‍વ ધરાવે છે. આ મહિના દરમિયાન રાજ્‍યમાં ૩૨,૬૨૬ પેસેન્‍જર વાહનો અને ૧.૩ લાખ ટુ-વ્‍હીલરનું રજીસ્‍ટ્રેશન થયું હતું. GST ઘટાડા બાદ પરિવારોમાં વધેલી કેશ ફલોની સ્‍થિતિએ વાહનોની માંગમાં વધારાને ટેકો આપ્‍યો છે. જોકે, ઉદ્યોગ જગતના આગેવાનો ગ્રામીણ વપરાશના જોખમો અંગે સાવચેત રહે છે.  ચોમાસાની સ્‍થિતિ અને વરસાદની સંભવિત ઘટ આગામી મહિનાઓમાં ગ્રામીણ માંગને અસર કરી શકે છે.