ગાંધીનગર : આગામી વાઈબ્રન્ટ ગુજરાત ગ્લોબલ સમિટ ૨૦૨૭ ની પૂર્વતૈયારીઓના ભાગરૂપે રાજ્યમાં વિદેશી રોકાણ આકર્ષવાના હેતુથી નાયબ મુખ્યમંત્રી હર્ષભાઈ સંઘવી જાપાન અને દક્ષિણ કોરિયાના મહત્ત્વના પ્રવાસે રવાના થઈ રહ્યા છે. તેઓ પોતાના આ રોડ-શો દરમિયાન જાપાનના ઓસાકા, કોબે અને ટોક્યો તેમજ દક્ષિણ કોરિયાના ડેગુ અને સિયોલ જેવા મુખ્ય શહેરોની મુલાકાત લઈને વૈશ્વિક રોકાણકારો અને ઉદ્યોગપતિઓ સાથે વ્યાપક બેઠકો યોજશે. આ આંતરરાષ્ટ્રીય મુલાકાત દરમિયાન ગુજરાતમાં નવા ઉદ્યોગોની સ્થાપના, ઔદ્યોગિક સહયોગ અને આંતરરાષ્ટ્રીય ભાગીદારી વધારવા પર વિશેષ ભાર મૂકવામાં આવશે.

આ મહત્વપૂર્ણ વિદેશ પ્રવાસમાં નાયબ મુખ્યમંત્રીની સાથે રાજ્ય સરકારના સિનિયર આઈએઈએસ અધિકારી મમતા વર્મા સહિતના ઉચ્ચ અધિકારીઓનું એક વિશેષ પ્રતિનિધિમંડળ પણ જોડાશે. આ પ્રતિનિધિમંડળ વિદેશી કંપનીઓ અને રોકાણકારો સમક્ષ ગુજરાતની વિશ્વસ્તરીય ઔદ્યોગિક સુવિધાઓ, નીતિવિષયક રાહતો અને ઈઝ ઓફ ડૂઈંગ બિઝનેસ અંગે વિગતવાર પ્રેઝન્ટેશન રજૂ કરશે. જો આ આંતરરાષ્ટ્રીય બેઠકો સફળતાપૂર્વક રોકાણ પ્રસ્તાવોમાં પરિવર્તિત થશે, તો ભવિષ્યમાં રાજ્યમાં મોટા પાયે નવા પ્રોજેક્ટ્સ સ્થાપાશે અને સ્થાનિક સ્તરે રોજગારીની પુષ્કળ તકો નિર્માણ પામશે.

નોંધનીય છે કે, આગામી વાઈબ્રન્ટ ગુજરાત ગ્લોબલ સમિટ ૧૦ થી ૧૨ જાન્યુઆરી, ૨૦૨૭ દરમિયાન ગાંધીનગરના મહાત્મા મંદિર ખાતે યોજાવાની છે, જેના ભાગરૂપે રાજ્ય સરકારે અત્યારથી જ વૈશ્વિક દેશો સાથે સંપર્ક અને મંત્રણાઓ તેજ બનાવી દીધી છે. આ અગાઉ યોજાયેલી સમિટ્સ દ્વારા પણ જાપાન અને દક્ષિણ કોરિયાની અનેક મલ્ટિનેશનલ કંપનીઓએ ગુજરાતમાં સાણંદ સહિતના વિસ્તારોમાં મોટું રોકાણ કર્યું છે, જે સંબંધોને વધુ મજબૂત બનાવવાની દિશામાં આ મુલાકાત અતિ મહત્વની માનવામાં આવે છે.

નાયબ મુખ્યમંત્રી અને પ્રતિનિધિમંડળના આ આંતરરાષ્ટ્રીય પ્રવાસ દરમિયાન યોજાનારી વ્યાપારી બેઠકોમાં ગુજરાતને એશિયાના શ્રેષ્ઠ ઇન્વેસ્ટમેન્ટ હબ તરીકે પ્રમોટ કરવામાં આવશે. પ્રવાસ પૂર્ણ થયા બાદ વિદેશી કંપનીઓ સાથે કયા ક્ષેત્રોમાં કરારો થાય છે અને રાજ્ય માટે કેટલા કરોડના રોકાણ પ્રસ્તાવો (MoUs) પ્રાપ્ત થાય છે, તેની વિગતો સામે આવ્યા બાદ જ આ પ્રવાસની સફળતાનું ચિત્ર વધુ સ્પષ્ટ બનશે.