વડોદરા : રાજકીય મહત્વકાંક્ષા અને પક્ષની આંતરિક જૂથબંધીમાં નેતાઓ કેટલા નીચે સુધી ગબડી શકે છે, તેનો એક અત્યંત શરમજનક અને ચોંકાવનારો કિસ્સો આણંદ અને વડોદરા પંથકમાં સામે આવ્યો છે. વડોદરા શહેર આમ આદમી પાર્ટી (AAP) ના પ્રમુખ અશોક ઓઝાએ પોતાના જ પક્ષના એક નિષ્ઠાવાન કાર્યકરને ભગાડવા માટે જે ખતરનાક ખેલ રચ્યો, તે જાણીને સૌ કોઈ સ્તબ્ધ છે. આણંદ પોલીસે નકલી IB અધિકારી બનીને ધમકાવવાના ગંભીર ગુનામાં વડોદરા AAP પ્રમુખ અશોક ઓઝા અને તેમના સાથીદારની ધરપકડ કરીને આ આખા કાવતરા પરથી પડદો ઉઠાવી દીધો છે.

વર્ષોથી ખૂંચતું હતું કાર્યકરનું વધતું વર્ચસ્વ

ઘટનાની વિગતો એવી છે કે, કેશવજી ચૌહાણ નામના કાર્યકરને પક્ષના સંગઠનને મજબૂત કરવા માટે વડોદરા મોકલવામાં આવ્યા હતા. કેશવજીની સક્રિયતા અને લોકપ્રિયતા જોઈને વડોદરા AAP પ્રમુખ અશોક ઓઝાને પોતાના રાજકીય અસ્તિત્વ પર ખતરો જણાવા લાગ્યો. કેશવજીનું વધતું વર્ચસ્વ અશોક ઓઝાને કાંટાની જેમ ખૂંચતું હતું. અંતે, કેશવજીને કાયમ માટે વડોદરામાંથી હટાવવા માટે ઓઝાએ એક પૂર્વ આયોજિત અને ગેરકાયદેસર કાવતરું ઘડી કાઢ્યું.

નકલી IB ઓફિસર બનીને કરી ધમકી

આ ખતરનાક કાવતરાને અંજામ આપવા અશોક ઓઝાએ પોતાના સાથીદાર નીતિન ધીરૂભાઇ ડાંગરીયાનો સંપર્ક કર્યો. નીતિને આઈબી (IB) ના મોટા અધિકારી હોવાનો સ્વાંગ રચ્યો અને ડિજિટલ માધ્યમથી કેશવજી ચૌહાણને ફોન કર્યો હતો. ફોન પર નીતિને કેશવજીને ભયાનક પરિણામો ભોગવવાની ધમકી આપી અને વડોદરા છોડી દેવા દબાણ કર્યું. જોકે, આ આખી ઘટનાનો ઓડિયો-વીડિયો સોશિયલ મીડિયા પર વાયરલ થઈ ગયો, જે અશોક ઓઝા માટે આત્મઘાતી સાબિત થયો.

રાજકીય ગરમાવો અને પોલીસની કડક કાર્યવાહી

વીડિયો વાયરલ થતાં જ આણંદ પોલીસ ત્વરિત હરકતમાં આવી ગઈ હતી. આ સમગ્ર મામલો દિલ્હી સુધી પહોંચતા ‘આપ’ના રાષ્ટ્રીય સંયોજક અરવિંદ કેજરીવાલે પણ ટ્વીટ કરીને આકરો રોષ વ્યક્ત કર્યો હતો. પોલીસે ડિજિટલ પુરાવાઓને આધારે વડોદરા AAP પ્રમુખ અશોક ચંદ્રકાંતભાઇ ઓઝા અને નીતિન ડાંગરીયા વિરુદ્ધ ખોટી ઓળખ ધારણ કરવા તથા ધમકાવવાનો ગુનો નોંધી બંનેની ધરપકડ કરી લીધી છે. હાલમાં પોલીસ એ દિશામાં પણ તપાસ કરી રહી છે કે આ કાવતરામાં અન્ય કોઈ નેતાઓની સંડોવણી છે કે કેમ. આ હાઈપ્રોફાઈલ ધરપકડ બાદ ગુજરાતના રાજકારણમાં ભારે ચકચાર મચી ગઈ છે.