રાજ્યના લાખો સરકારી કર્મચારીઓ અને પેન્શનરો માટે દિવાળીનો તહેવાર વધુ રોશન અને ખુશીઓથી ભરેલો બની રહેશે. તહેવારોની મોસમમાં સરકારી કર્મચારીઓને મોટી આર્થિક રાહત આપતા રાજ્ય સરકારે મોંઘવારી ભથ્થા (DA) માં 3 ટકા વધારાને મંજૂરી આપી દીધી છે. 

દિવાળી પૂર્વે લેવાયેલા આ મહત્વપૂર્ણ નિર્ણયથી રાજ્ય સરકારના વર્ગ 1 થી લઈને વર્ગ 4 ના કર્મચારીઓ તેમજ પેન્શનરોને સીધો આર્થિક લાભ મળશે. મોંઘવારીના સમયમાં કર્મચારીઓના પગાર અને ભથ્થામાં વધારો થતાં તેમના ખિસ્સા પરનો બોજ હળવો થશે. સરકારના આ નિર્ણયથી સરકારી કર્મચારી મંડળો અને કર્મચારીઓમાં ખુશીનો માહોલ જોવા મળી રહ્યો છે.

સુત્રોના જણાવ્યા અનુસાર, 3 ટકા મોંઘવારી ભથ્થામાં વધારાની આ દરખાસ્તને મંજૂરી મળી ગઈ છે અને આ અંગેની સત્તાવાર જાહેરાત તથા વિધિવત નોટિફિકેશન રાજ્ય સરકાર દ્વારા ટૂંક સમયમાં બહાર પાડવામાં આવશે. તહેવારોના સમયે જ આ નિર્ણય લેવાતા સરકારી કર્મચારીઓને મોટો આર્થિક ટેકો મળશે.