વડોદરા : વડોદરા શહેરના નાગરિકો માટે મોંઘવારીનો વધુ એક મોટો ફટકો પડ્યો છે. અદાણી ગેસ દ્વારા તાજેતરમાં કરવામાં આવેલા ભાવવધારા બાદ હવે વડોદરા ગેસ લિમિટેડ (VGL) એ પણ ઈંધણ અને ઘરેલુ ગેસના ભાવમાં વધારો કરવાની જાહેરાત કરી છે. આ નિર્ણયને કારણે શહેરીજનોના માસિક બજેટ પર મોટો બોજ આવી પડ્યો છે, જેને લઈને વાહનચાલકો અને ગૃહિણીઓમાં ભારે અસંતોષ જોવા મળી રહ્યો છે.

CNG ના ભાવ વધીને રૂ. ૮૬.૫૦ પ્રતિ કિલો થયા

પ્રાપ્ત વિગતો અનુસાર, વડોદરા ગેસ લિમિટેડ દ્વારા કોમ્પ્રેશ્ડ નેચરલ ગેસ (CNG) ના ભાવમાં પ્રતિ કિલો ૫૫ પૈસાનો વધારો કરવામાં આવ્યો છે. આ ભાવવધારા પહેલા વડોદરામાં CNG નો દર રૂ. ૮૫.૯૫ પ્રતિ કિલો હતો, જે હવે વધીને રૂ. ૮૬.૫૦ પ્રતિ કિલો થઈ ગયો છે. દૈનિક ધોરણે વાહન ચલાવતા નોકરિયાત વર્ગ, કેબ ડ્રાઇવરો અને ખાસ કરીને ઓટો રિક્ષાચાલકોની દૈનિક કમાણી પર આ વધારાની સીધી નકારાત્મક અસર પડશે.

રસોડાનો ગેસ પણ મોંઘો: ઘરેલુ PNG માં રૂ. ૧ નો વધારો

માત્ર વાહનચાલકો જ નહીં પરંતુ ગૃહિણીઓના રસોડાનું બજેટ પણ ખોરવાઈ ગયું છે. VGL એ ઘરેલુ વપરાશ માટેના પાઇપ્ડ નેચરલ ગેસ (PNG) ના ભાવમાં પ્રતિ Standard Cubic Meter (SM³) ૧ રૂપિયાનો વધારો ઝીંક્યો છે. આ વધારા સાથે જ ઘરેલુ PNG નો ભાવ હવે રૂ. ૫૩.૭૪ થી વધીને રૂ. ૫૪.૭૪ પ્રતિ SM³ પર પહોંચી ગયો છે. સતત વધી રહેલા રાંધણ ગેસના ભાવથી મધ્યમ વર્ગીય પરિવારોની આર્થિક ગણતરીઓ ઉંધી વળી ગઈ છે.

આંતરરાષ્ટ્રીય બજાર અને આયાત ખર્ચને ગણાવ્યું કારણ

ઉલ્લેખનીય છે કે, અગાઉ અદાણી ગેસે ભાવવધારો કર્યો હતો અને હવે VGL એ પણ તે જ રાહ અપનાવી છે. આંતરરાષ્ટ્રીય બજારમાં કુદરતી ગેસની કિંમતોમાં અસ્થિરતા અને આયાત ખર્ચમાં થયેલા વધારાને આ નિર્ણય માટે મુખ્ય કારણ માનવામાં આવી રહ્યું છે. જોકે, સતત વધી રહેલી મોંઘવારી વચ્ચે નાગરિકો તંત્ર અને ગેસ કંપનીઓ પાસે આ ભાવવધારો ત્વરિત ધોરણે પાછો ખેંચવાની અથવા રાહત આપવાની માંગ કરી રહ્યા છે.