ગુજરાતના લાખો પશુપાલકો માટે અમૂલ ડેરી તરફથી ડબલ ખુશખબર સામે આવ્યા છે. પશુપાલકોના હિતને હંમેશા પ્રાધાન્ય આપતી અમૂલ ડેરીએ દૂધના ખરીદ ભાવમાં વધારો કરવાની જાહેરાત કરીને પશુપાલકોને આર્થિક રીતે મોટી રાહત આપી છે. આ ઉપરાંત, ડેરીએ ચાલુ નાણાકીય વર્ષ દરમિયાન વ્યાપાર ક્ષેત્રે પણ ઐતિહાસિક સફળતા મેળવી છે.

અમૂલ ડેરી દ્વારા લેવાયેલા પશુપાલક લક્ષી નિર્ણય મુજબ, દૂધના ખરીદ ભાવમાં પ્રતિ કિલો ફેટે ₹૧૦નો સીધો વધારો ઝીંકવામાં આવ્યો છે. ઉનાળાની આ સિઝનમાં જ્યારે પશુઓના નિભાવ અને ઘાસચારાનો ખર્ચ વધી જતો હોય છે, ત્યારે અમૂલ દ્વારા કરવામાં આવેલો આ વધારો પશુપાલકોની આવકમાં નોંધપાત્ર વૃદ્ધિ કરશે. આ નિર્ણયથી આણંદ, ખેડા અને મહિસાગર જિલ્લાના લાખો દૂધ ઉત્પાદક પરિવારોમાં ખુશીનો માહોલ છવાઈ ગયો છે.

ભાવ વધારાની સાથે જ અમૂલ ડેરીએ બિઝનેસ ક્ષેત્રે પણ નવો ઈતિહાસ રચી દીધો છે. વર્ષ દરમિયાન અમૂલ ડેરીએ ઓલટાઈમ હાઈ રેકોર્ડબ્રેક 15,113 કરોડનું વાર્ષિક ટર્નઓવર હાંસલ કર્યું છે. ડેરીના આ મજબૂત આર્થિક પ્રદર્શનથી સાબિત થાય છે કે વૈશ્વિક બજાર અને સ્થાનિક બજારમાં અમૂલ પ્રોડક્ટ્સની માંગ સતત અવિરતપણે વધી રહી છે. આ સફળતા પાછળ લાખો પશુપાલકોની મહેનત અને ગ્રાહકોનો અતૂટ વિશ્વાસ જવાબદાર છે.

પશુપાલન ક્ષેત્રે ટેકનોલોજી અને સંશોધનને પ્રોત્સાહન આપવા માટે અમૂલ ડેરીએ વધુ એક સાહસિક પ્રોજેક્ટની જાહેરાત કરી છે. આણંદ નજીક આવેલા ઓડ ગામ ખાતે એશિયા ખંડની સૌથી મોટી અને આધુનિક 'સિમેન લેબ' સ્થાપવામાં આવશે. આ અત્યાધુનિક લેબના કારણે પશુઓની ઓલાદ સુધારણા કાર્યક્રમને ખૂબ જ મોટો વેગ મળશે, જેનાથી આગામી સમયમાં પશુઓની દૂધ ઉત્પાદન ક્ષમતામાં અનેકગણો વધારો થશે અને પશુપાલન વ્યવસાય વધુ નફાકારક બનશે.