​રાજકોટ:આજના આધુનિક યુગમાં દીકરીઓની સુરક્ષા, શિક્ષણ અને તેમના ઘડતરને લઈને સામાજિક સ્તરે ગંભીર ચર્ચાઓ ચાલી રહી છે. ઉત્તર પ્રદેશના રાજ્યપાલ આનંદીબેન પટેલે તાજેતરમાં દીકરીઓના શિક્ષણ અને સોશિયલ મીડિયાના અતાર્કિક ઉપયોગ અંગે વ્યક્ત કરેલી ચિંતા બાદ હવે વિશ્વ ઉમિયાધામના પ્રમુખ આર.પી. પટેલે આ મુદ્દે મજબૂત પ્રતિભાવ આપતા મહત્વની માર્ગદર્શિકા જાહેર કરી છે. તેમણે સ્પષ્ટપણે જણાવ્યું છે કે, દીકરીઓએ કોઈપણ પ્રકારની લોભ-લાલચમાં ફસાયા વગર માત્ર અને માત્ર પોતાના અભ્યાસ અને ધ્યેય પર જ પૂરેપૂરું ધ્યાન કેન્દ્રિત કરવું જોઈએ.

​લોભ-લાલચથી સાવધાન રહેવાની તાકીદ

આર.પી. પટેલે રાજ્યપાલના મંતવ્યો સાથે સંપૂર્ણ સહમતી દર્શાવતા જણાવ્યું હતું કે, આજના સમયમાં યુવા પેઢી, ખાસ કરીને દીકરીઓ ઘણીવાર સોશિયલ મીડિયા કે અન્ય પ્રલોભનોમાં આવીને આવારા તત્વો કે ખોટા લોકોના સંપર્કમાં આવી જાય છે. આ પ્રકારની ઘટનાઓ તેમના ઉજ્જવળ ભવિષ્યને અંધકારમય બનાવી શકે છે. તેમણે સમાજને સાવચેત કરતા કહ્યું કે, દીકરીઓનું શિક્ષણ જ તેમની પ્રથમ પ્રાથમિકતા હોવી જોઈએ. જો તેઓ પોતાના લક્ષ્યથી ભટકશે તો મુશ્કેલીઓ વધી શકે છે. આ બાબતે માત્ર દીકરીઓ જ નહીં, પરંતુ પરિવારે પણ અત્યંત જાગૃત અને સતર્ક રહેવાની જરૂર છે.

​'ઘર સભા' અને પારિવારિક સંવાદનો મંત્ર

આ સમસ્યાના ઉકેલ માટે આર.પી. પટેલે એક સચોટ ઉપાય સૂચવતા કહ્યું કે, દરેક પરિવારે દરરોજ રાત્રે ઓછામાં ઓછો એક કલાક 'ઘર સભા' માટે ફાળવવો જોઈએ. આ સમય દરમિયાન મોબાઈલ ફોન દૂર રાખીને પરિવારના તમામ સભ્યોએ એકબીજા સાથે મુક્તપણે વાતો કરવી જોઈએ. આવી આદતથી પરિવારના સભ્યો વચ્ચે મિત્રતા વધશે અને દીકરીઓ પોતાના મનની વાતો માતા-પિતા સાથે નિઃસંકોચ શેર કરી શકશે. જ્યારે પરિવારમાં સંવાદ હશે, ત્યારે દીકરીઓ ખોટા માર્ગે જતી અટકી શકશે.

​ધર્મ અને સંસ્કૃતિ સાથે જોડાણ અનિવાર્ય

વિશ્વ ઉમિયાધામના પ્રમુખે વધુમાં જણાવ્યું હતું કે, નવી પેઢીને સંસ્કારી અને સુરક્ષિત રાખવા માટે સમાજના મંદિરોમાં સમૂહ આરતી જેવી ધાર્મિક અને સામાજિક પ્રવૃત્તિઓમાં સહભાગી બનાવવી જોઈએ. આનાથી યુવાનો પોતાની સંસ્કૃતિ સાથે જોડાયેલા રહેશે અને નકારાત્મક પ્રભાવોથી દૂર રહેશે. વિશ્વ ઉમિયાધામ દ્વારા પણ આ દિશામાં જાગૃતિ લાવવા માટેના પ્રયાસો હાથ ધરવામાં આવ્યા છે, જેથી સમાજમાં એકતા જળવાય અને દીકરીઓ ગૌરવભેર આગળ વધી શકે.