અમદાવાદ : આંતરરાષ્ટ્રીય સાક્ષરતા દિવસ (૮ સપ્ટેમ્બર) ની પૂર્વસંધ્યાએ અમદાવાદ જિલ્લાના શિક્ષણ વિભાગે એક નવો અને ઐતિહાસિક માઇલસ્ટોન સર કર્યો છે. રાજ્ય સરકારના 'મિશન સ્કૂલ્સ ઓફ એક્સીલન્સ' અને ડિજિટલ લર્નિંગ પ્રકલ્પોના કારણે શૈક્ષણિક વર્ષ ૨૦૨૫-૨૬ માં ૪,૮૧૭ જેટલા વિદ્યાર્થીઓએ ખાનગી શાળાઓ (Private Schools) છોડીને અમદાવાદ જિલ્લાની સરકારી શાળાઓમાં પ્રવેશ મેળવ્યો છે. આ આંકડો દર્શાવે છે કે વાલીઓનો સરકારી શિક્ષણ પ્રણાલી પ્રત્યેનો દૃષ્ટિકોણ અને વિશ્વાસ હવે ઝડપથી બદલાઈ રહ્યો છે.

ગુજરાતના મુખ્યમંત્રી ભૂપેન્દ્ર પટેલના નેતૃત્વ હેઠળ ગાંધીનગર ખાતે સ્થાપિત વિશ્વસ્તરીય 'વિદ્યા સમીક્ષા કેન્દ્ર' અને ડેટા-ડ્રાઇવન પોલિસીને કારણે રાજ્યમાં શિક્ષણનું સ્તર આમૂલચૂલ બદલાયું છે. હવે સરકારી શાળાઓમાં સાક્ષરતાનો અર્થ કેવળ અક્ષરજ્ઞાન પૂરતો મર્યાદિત નથી રહ્યો, પરંતુ બાળકોને ડિજિટલ અને વૈજ્ઞાનિક રીતે સાક્ષર બનાવવામાં આવી રહ્યા છે. અમદાવાદના ગ્રામીણ અને શહેરી વિસ્તારોની સરકારી સ્કૂલોમાં હવે પરંપરાગત ચોક-ડસ્ટરની જગ્યાએ થ્રીડી (3D) એનિમેટેડ કન્ટેન્ટ ધરાવતા સ્માર્ટ બોર્ડ, કોમ્પ્યુટર લેબ અને સાયન્સ-ટેકનોલોજી (STEM) લેબ ઉપલબ્ધ કરાવવામાં આવી છે.

તાલીમબદ્ધ અને અનુભવી શિક્ષકોના નિષ્ઠાપૂર્વકના પ્રયાસો તેમજ આધુનિક સુવિધાઓના સમન્વયથી સરકારી શાળાઓ ગુણવત્તાસભર શિક્ષણનું નવું સરનામું બની ગઈ છે. આંતરરાષ્ટ્રીય સાક્ષરતા દિવસે અમદાવાદની આ અદ્ભુત સફળતા એ સાબિત કરે છે કે યોગ્ય નીતિ અને સુવિધાઓ મળે તો સરકારી શિક્ષણ પણ ખાનગી શાળાઓને માત આપી શકે છે.

ખાનગી શાળાઓની ભારે ફી સામે સરકારી શાળાઓમાં થઈ રહેલું આ ડિજિટલ પરિવર્તન મધ્યમ અને ગરીબ વર્ગના બાળકો માટે વરદાન સાબિત થશે.