​​સુરત: સુરતના સચિન વિસ્તારમાંથી પોલીસે બ્રાઉન શુગરના ગેરકાયદેસર કારોબારનો પર્દાફાશ કરીને મોટી સફળતા મેળવી છે. ઓડિશાથી સુરતમાં બ્રાઉન શુગરનો જથ્થો વેચવા આવેલા 3 શખ્સોને પોલીસે બાતમીના આધારે ઝડપી પાડ્યા છે. ચોંકાવનારી વાત એ છે કે પકડાયેલા આરોપીઓમાંથી 2 યુવાનો ઓડિશામાં એન્જિનિયરિંગ (ITI ઈલેક્ટ્રિકલ)નો અભ્યાસ કરતા વિદ્યાર્થીઓ છે.
​પોલીસનું સફળ ઓપરેશન
​સચિન પોલીસ મથકની ટીમને ચોક્કસ બાતમી મળી હતી કે ઓડિશાથી કેટલાક યુવાનો નશીલા પદાર્થો સાથે સુરતમાં પ્રવેશ્યા છે. આ બાતમીના આધારે પોલીસે વોચ ગોઠવીને જીબાન, ચિન્મય અને ચંદ્રશેખર નામના ત્રણેય આરોપીઓને દબોચી લીધા હતા. તેમની પાસેથી બ્રાઉન શુગરનો જથ્થો કબ્જે કરવામાં આવ્યો છે.
​ઝડપી પૈસા કમાવવાની લાલચ બની કારણ
​પોલીસની પ્રાથમિક તપાસમાં બહાર આવ્યું છે કે, આ ત્રણેય આરોપીઓ ઓડિશામાં આઈટીઆઈ ઈલેક્ટ્રિકલ એન્જિનિયરિંગનો અભ્યાસ કરી રહ્યા હતા. સોશિયલ મીડિયાના સંપર્ક અને ટૂંકા સમયમાં ઝડપથી પૈસા કમાઈ લેવાની ઘેલછામાં તેઓ આ ગેરકાયદેસર ધંધામાં હોમાયા હતા.
​રૂ. 10 થી 15 હજારના કમિશન માટે બન્યા કેરિયર
​મુખ્ય સૂત્રધાર ચિન્મય નામના શખ્સે અન્ય સાથીઓને સુરત સુધી ડ્રગ્સની હેરાફેરી કરવા બદલ રૂ. 10,000 થી 15,000 સુધીનું કમિશન આપવાની લાલચ આપી હતી. આ રકમ અને પોકેટ મનીની લાલચમાં આવીને વિદ્યાર્થીઓ ઓડિશાથી સુરત સુધી નશાનો સામાન પહોંચાડવા માટે તૈયાર થઈ ગયા હતા.
​હાલ પોલીસે ત્રણેય આરોપીઓ વિરુદ્ધ ગુનો નોંધીને તેમની ધરપકડ કરી છે. આ ડ્રગ્સ સુરતમાં કોને પહોંચાડવાનું હતું અને આ કારોબાર પાછળ ઓડિશા કે સુરતનું બીજું કયું મોટું નેટવર્ક કામ કરી રહ્યું છે તે દિશામાં પોલીસે વધુ તપાસ હાથ ધરી છે.