મહેસાણા : મહેસાણા જિલ્લામાં સાયબર ક્રાઈમ પોલીસે શેરબજારમાં રોકાણના નામે ઊંચા વળતર અને ભારે નફાની લાલચ આપીને નાગરિકો સાથે આર્થિક ઠગાઈ આચરતા એક કુખ્યાત અને ગેરકાયદેસર નકલી કોલ સેન્ટરનો પર્દાફાશ કર્યો છે. મહેસાણા સાયબર ક્રાઈમ પોલીસ સ્ટેશનની ટીમે ચોક્કસ બાતમીના આધારે ઉચરપી ગામની સીમમાં જી.એસ. ફાર્મ પાસે આવેલી એક બોરની ઓરડી પર અચાનક દરોડો પાડ્યો હતો. આ સઘન દરોડા દરમિયાન પોલીસે સ્થળ પરથી ગેરકાયદેસર પ્રવૃત્તિ ચલાવી રહેલા કુલ ૮ આરોપીઓને રંગેહાથ ઝડપી પાડવામાં મોટી સફળતા મેળવી છે.

પ્રાપ્ત વિગતો અનુસાર, પકડાયેલા આરોપીઓ પોતાના એન્ડ્રોઇડ મોબાઈલ ફોનમાં 'માર્કેટ પલ્સ' (Market Pulse) તથા અન્ય ઓનલાઈન ટ્રેડિંગ એપ્લિકેશનો રાખીને શેરબજારની વધઘટ પર નજર રાખતા હતા. આ ઠગ ટોળકી દ્વારા ડમી સિમકાર્ડ અને રેન્ડમ મોબાઈલ નંબરોના લીસ્ટના આધારે રાજ્યભરના અજાણ્યા નાગરિકોને ફોન કરવામાં આવતા હતા. તેઓ પોતાને 'શ્યામ સ્ટોક એડવાઇઝર' નામની કાલ્પનિક કંપનીના અધિકૃત પ્રતિનિધિ તરીકે ઓળખ આપીને ભોળા રોકાણકારોને શેરબજારમાં ટૂંકા સમયમાં મોટો નફો અપાવવાની લાલચ આપતા હતા અને ઠગાઈ આચરતા હતા.

આ ગેરકાયદેસર પ્રવૃત્તિમાં સંડોવાયેલા ઝડપાયેલા ૮ આરોપીઓમાં રાજકુમાર ચૌધરી, રોહિતકુમાર સેનમા, નિલેશજી ઠાકોર, વિપુલજી ઠાકોર, અંકિતકુમાર રાવળ, અમનસિંગ સિંગ, ધવલકુમાર પરમાર અને પરેશભાઈ રાવળનો સમાવેશ થાય છે. પોલીસે દરોડા દરમિયાન સ્થળ પરથી ગુનામાં વપરાતા સાધનો અને પુરાવાઓ જપ્ત કર્યા છે, જેમાં આશરે રૂ. ૧,૧૫,૦00ની કિંમતના ૧૩ સ્માર્ટફોન તથા એપલ આઈફોન, રૂ. ૭,૦૦૦ની કિંમતના ૭ કી-પેડવાળા મોબાઈલ, ૨ નકલી આઈડી કાર્ડ તેમજ શ્યામ એડવાઇઝરીના નામના નકલી કન્સલ્ટીંગ કાર્ડ અને ડમી સિમકાર્ડના કવર્સ સહિત કુલ આશરે રૂ. ૧,૨૨,૦૦૦નો મુદ્દામાલ કબજે કર્યો છે.

પોલીસ તપાસમાં બહાર આવ્યું છે કે આ રેકેટના તાર ઘણાં લાંબા છે અને તેના મુખ્ય સૂત્રધાર તરીકે વિષ્ણુભાઈ ઉર્ફે બચ્ચન તથા વિકાસ ઉર્ફે વિકો તેમજ ગ્રાહકોનો ડેટા પૂરો પાડનાર અન્ય શખ્સો આ કૌભાંડ પાછળ સક્રિય હતા. સાયબર ક્રાઈમ પોલીસે તમામ ૮ આરોપીઓ વિરુદ્ધ ભારતીય ન્યાય સંહિતા (BNS) ૨૦૨૩ તથા અન્ય સંબંધિત કલમો હેઠળ ગંભીર ગુનો નોંધીને કાયદેસરની કડક કાર્યવાહી હાથ ધરી છે. હાલમાં આ નેટવર્કના મુખ્ય સૂત્રધારો અને ફરાર અન્ય આરોપીઓને ઝડપી પાડવા માટે પોલીસ દ્વારા ચક્રો ગતિમાન કરવામાં આવ્યા છે.

વર્તમાન સમયમાં ઓનલાઈન ટ્રેડિંગ અને શેરબજારના નામે છેતરપિંડી આચરતી આવી ગેંગો સામાન્ય નાગરિકોની મહેનતની કમાણી હડપ કરી રહી છે, જેને લઈને સાયબર સુરક્ષા એજન્સીઓ દ્વારા અગાઉ પણ અનેકવાર જાગૃતિ અભિયાન ચલાવવામાં આવ્યા છે. મહેસાણા પોલીસ દ્વારા આ કેસમાં ટેક્નિકલ એનાલિસિસ અને બેંક ખાતાઓની વિગતોના આધારે વધુ તપાસ કરવામાં આવી રહી છે, જેથી આ કૌભાંડ સાથે જોડાયેલા અન્ય નાણાકીય વ્યવહારો અને મોટા રેકેટનો पर्દાફાશ કરી શકાય.

મહેસાણા સાયબર ક્રાઈમ પોલીસ સ્ટેશનના અધિકારીઓએ જણાવ્યું છે કે રિમાન્ડ મેળવીને આરોપીઓની ઊંડાણપૂર્વક પૂછપરછ કરવામાં આવશે અને આ નેટવર્ક ક્યાં-ક્યાં સુધી ફેલાયેલું છે તેની સંપૂર્ણ વિગતો બહાર લાવવામાં આવશે. નાગરિકોને અપીલ કરવામાં આવી છે કે તેઓ કોઈપણ અજાણી કંપની કે વ્યક્તિની લાલચમાં આવ્યા વિના અધિકૃત અને રજિસ્ટર્ડ પ્લેટફોર્મ્સ સિવાય નાણાકીય રોકાણ કરવાનું ટાળે અને સાયબર ફ્રોડથી સાવચેત રહે.