તા. ૨૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૩ રવિવાર
News of Sunday, 22nd November 2026
અમદાવાદમાં નકલી પોલીસનો પર્દાફાશ : વૃદ્ધોને ડરાવીને લૂંટતો રીઢો ગુનેગાર ક્રાઈમ બ્રાન્ચના હાથે ઝડપાયો
શહેરકોટડામાં 60 વર્ષીય વૃદ્ધ પાસેથી 9 હજારની લૂંટ, બાપુનગર પોસ્ટ ઓફિસ પાસેથી આરોપી ઝડપાયો - 89,500નો મુદ્દામાલ જપ્ત, જેલમાંથી છૂટ્યા બાદ 5 ગુના કબૂલ્યા

અમદાવાદ : અમદાવાદ ક્રાઈમ બ્રાન્ચે પોલીસની ખોટી ઓળખ આપીને વૃદ્ધ નાગરિકોને નિશાન બનાવતી ગેંગનો પર્દાફાશ કર્યો છે. પોલીસ બનીને નાગરિકો પાસેથી બળજબરીથી રૂપિયા પડાવતા રીઢા ગુનેગારને ક્રાઈમ બ્રાન્ચે બાપુનગર પોસ્ટ ઓફિસ પાસેથી ઝડપી પાડ્યો છે.
પકડાયેલા આરોપીની ઓળખ *મોહમ્મદ શાહરૂખ અંસારી (ઉં. 32)* તરીકે થઈ છે. તે રખિયાલ વિસ્તારમાં માછી બજાર પાસે પ્રભાવતી ની ચાલીમાં રહે છે. તેનો સાથી સરફરાજ ઉર્ફે બડી મલાઈ મિર્ઝા હાલ ફરાર છે, જેની શોધખોળ ચાલી રહી છે.
7 નવેમ્બરની રાત્રે લગભગ 12:30 વાગ્યે 60 વર્ષીય મનીષકુમાર જાની અને તેમના મિત્ર મહેન્દ્રભાઈ પોમાલા શહેરકોટડા વિસ્તારમાં મહાવીર એન્ડ સન્સ દુકાન બહાર બનેલા ચબૂતરા પર બેઠા હતા.
તે સમયે શાહરૂખ અને સરફરાજ ઓટો રિક્ષામાં ત્યાં આવ્યા અને પોતાને પોલીસકર્મી ગણાવી બંને વૃદ્ધોને ડરાવી-ધમકાવી તેમના ખિસ્સામાંથી *રૂ. 9,000* છીનવીને ફરાર થઈ ગયા હતા.
ભોગ બનનારે શહેરકોટડા પોલીસ સ્ટેશનમાં ફરિયાદ નોંધાવતા ક્રાઈમ બ્રાન્ચે તપાસ શરૂ કરી હતી. 19 નવેમ્બરે મળેલી બાતમીના આધારે પોલીસ ટીમે બાપુનગર ડાકઘર પાસેથી શાહરૂખને ઝડપી પાડ્યો હતો.
પોલીસે તેની પાસેથી રોકડ, મોબાઈલ ફોન અને ગુનામાં વપરાયેલી ઓટો રિક્ષા સહિત કુલ રૂ. 89,500નો મુદ્દામાલ કબજે કર્યો છે.
પૂછપરછમાં આરોપીએ ખુલાસો કર્યો છે કે, તે 21 ઓક્ટોબરે જેલમાંથી છૂટ્યા બાદ પોતાના સાથીઓ સાથે મળીને અમદાવાદના અલગ-અલગ વિસ્તારોમાં 5 અન્ય ઘટનાઓને અંજામ આપી ચૂક્યો છે.
તપાસમાં મણિનગર, ઓઢવ, નરોડા, કાલુપુર, ગોમતીપુર અને સિવિલ હોસ્પિટલ વિસ્તારમાં પણ ગુના આચર્યા હોવાની વિગતો બહાર આવી છે. આરોપી સામે અગાઉ પણ ચોરી, લૂંટ સહિતના અનેક ગુના નોંધાયેલા છે.
આરોપી અને મુદ્દામાલને વધુ તપાસ માટે શહેરકોટડા પોલીસને સોંપવામાં આવ્યા છે. ફરાર સાથી સરફરાજને ઝડપી પાડવા ક્રાઈમ બ્રાન્ચે વધુ તપાસ હાથ ધરી છે.
(4:22 PM IST)









છેલ્લા 8 દિવસમાં સૌથી લોકપ્રિય 
