વડોદરા જિલ્લાના શિનોર તાલુકાના અચીસરા ગામે ચાંદલાના પૈસાની લેવડદેવડ જેવી સામાન્ય બાબતમાં પારિવારિક વિવાદ વકરતા એક દંપતી પર જીવલેણ હુમલો કરાયો હોવાની ચોંકાવનારી ઘટના સામે આવી છે. સગા કાકા સહિત પરિવારના જ ચાર લોકોએ ભેગા મળીને આ દંપતીને જાહેરમાં લાકડીઓ અને ઢીકાપાટુનો નિર્મમ માર માર્યો હતો, જેમાં ગંભીર રીતે ઘવાયેલી એક ગર્ભવતી મહિલાને તાત્કાલિક સારવાર અર્થે હોસ્પિટલમાં ખસેડવામાં આવી છે. આ હિંસક ઘટના અંગે ભોગ બનનાર પરિવારે ફરિયાદ નોંધાવતા જ શિનોર પોલીસે તાકીદે એક્શન લઈને હુમલો કરનારા કાકા સહિત ચારેય આરોપીઓને ઝડપી પાડી કાયદેસરની જેલભેગા કર્યા છે.