નડિયાદ : નડિયાદ શહેરના કોલેજ રોડ પર કેનાલ પાસે નવા વર્ષના પાવન અવસરે અચાનક ભીષણ આગ ભભૂકી ઉઠતાં કપડાં અને નાસ્તાના વેપારીઓની આઠ જેટલી દુકાનો બળીને ખાખ થઈ ગઈ હતી અને સમગ્ર વિસ્તારમાં અફરાતફરીનો માહોલ સર્જાઈ ગયો હતો.

પ્રાપ્ત વિગતો અનુસાર, સ્થાનિક લોકોના જણાવ્યા મુજબ સૌથી પહેલાં એક નાસ્તાના બંધ સ્ટોલમાં અચાનક આગ દેખાઈ હતી, જેણે ટૂંક સમયમાં જ વિકરાળ સ્વરૂપ ધારણ કરી લીધું હતું અને બાજુમાં આવેલા બીયર બાર સહિત અનેક દુકાનોને પોતાની ઝપેટમાં લઈ લીધી હતી.

આગ એટલી ઝડપથી ફેલાઈ ગઈ હતી કે દુકાનદારોને અંદર રહેલો માલસામાન કે કિંમતી સામાન બહાર કાઢવાની પણ તક મળી નહોતી, જેના કારણે વેપારીઓને ભારે આર્થિક નુકસાન સહન કરવાનો વારો આવ્યો છે.

ઘટનાની જાણ થતાં જ નડિયાદ ફાયર વિભાગની ચાર ગાડીઓ તાત્કાલિક ઘટનાસ્થળે દોડી આવી હતી અને યુદ્ધના ધોરણે લગભગ એક કલાક સુધી સતત પાણીનો મારો ચલાવીને આગ આસપાસના વિસ્તારોમાં વધુ ફેલાતી અટકાવીને સંપૂર્ણપણે કાબૂમાં લીધી હતી.

જિલ્લા ફાયર ઓફિસર દીક્ષિત પટેલે આ અંગે માહિતી આપતા જણાવ્યું હતું કે ફૂડ સ્ટોલ બંધ હોવાના કારણે કોઈ મોટી જાનહાની ટળી ગઈ હતી, પરંતુ આગ લાગવાનું ચોક્કસ કારણ હજુ સુધી જાણી શકાયું નથી જે અંગે તપાસ હાથ ધરવામાં આવી છે.

વહીવટી તંત્ર દ્વારા હવે સંબંધિત દુકાનોમાં ફાયર સેફટીના નિયમોનું પાલન થયું હતું કે નહીં અને અગાઉ આપવામાં આવેલી નોટિસ બાદ શું કાર્યવાહી થઈ હતી તેની ઊંડાણપૂર્વક તપાસ કરીને આગામી સમયમાં કાયદેસરના પગલાં લેવામાં આવશે.