અમદાવાદ : ગુજરાતમાં જાણે આકાશમાંથી અગનગોળા વરસી રહ્યા હોય તેવી સ્થિતિ સર્જાઈ છે. રાજ્યના મોટાભાગના વિસ્તારોમાં ગરમીનો પારો 43 ડિગ્રીને પાર કરી જતાં જનજીવન પ્રભાવિત થયું છે. હવામાન વિભાગના તાજેતરના આંકડા મુજબ, સૌરાષ્ટ્રનું અમરેલી શહેર 43.3 ડિગ્રી તાપમાન સાથે રાજ્યનું સૌથી ગરમ શહેર નોંધાયું છે. તેની પાછળ રાજકોટ 43.1 ડિગ્રી અને સુરેન્દ્રનગર 43.0 ડિગ્રી તાપમાન સાથે કાળઝાળ ગરમીની ઝપેટમાં છે. 

 રાજ્યના ઉત્તર અને મધ્ય ભાગોમાં પણ સ્થિતિ સમાન છે, જ્યાં અમદાવાદમાં 42.2 ડિગ્રી અને પાટનગર ગાંધીનગરમાં 41.5 ડિગ્રી તાપમાન નોંઘાતા બપોરના સમયે રસ્તાઓ સુમસામ જોવા મળ્યા હતા. વડોદરા અને ભુજમાં પણ પારો 41 ડિગ્રીની ઉપર સ્થિર રહ્યો છે, જ્યારે દરિયાકાંઠાના વિસ્તારો એવા કંડલા અને કેશોદમાં 42.0 ડિગ્રી તાપમાનને કારણે બફારા અને ગરમીનું બેવડું જોર જોવા મળ્યું છે.

નિષ્ણાતોના મતે, પશ્ચિમ તરફથી ફૂંકાતા ગરમ પવનો અને એન્ટી-સાયક્લોનિક સરક્યુલેશનને કારણે તાપમાનમાં આ ઉછાળો જોવા મળી રહ્યો છે. સામાન્ય રીતે એપ્રિલના અંતમાં અને મે મહિનાની શરૂઆતમાં ગરમીનું મોજું પ્રબળ બનતું હોય છે, પરંતુ આ વર્ષે પારો અપેક્ષા કરતા વહેલો ઊંચકાયો છે. આરોગ્ય વિભાગ દ્વારા નાગરિકોને ખાસ કરીને બપોરે 12 થી 4 વાગ્યા દરમિયાન બિનજરૂરી બહાર ન નીકળવા અને પુષ્કળ પ્રમાણમાં પ્રવાહી લેવા સલાહ આપવામાં આવી છે. સતત વધતા તાપમાનને પગલે ખેતીના પાકો પર પણ માઠી અસર પડવાની ભીતિ સેવાઈ રહી છે, ખાસ કરીને ઉનાળુ પાકોને વારંવાર પિયતની જરૂરિયાત ઉભી થઈ છે.

હવામાન કચેરીની આગાહી મુજબ, આગામી 48 કલાક દરમિયાન તાપમાનમાં હજુ પણ આંશિક વધારો થઈ શકે છે. હીટ એક્શન પ્લાન હેઠળ મહાનગરપાલિકાઓ દ્વારા જાહેર સ્થળો પર પીવાના પાણીની વ્યવસ્થા અને ગરમીથી બચવા માટેના કેન્દ્રો કાર્યરત કરવામાં આવ્યા છે. હોસ્પિટલોમાં પણ હીટસ્ટ્રોકના દર્દીઓ માટે સ્પેશિયલ વોર્ડ તૈયાર રાખવાની સૂચના અપાઈ છે. જળવાયુ પરિવર્તનની અસરને કારણે હવે ગુજરાતમાં ઉનાળો વધુ આકરો બની રહ્યો છે, જે ભવિષ્યમાં પણ ગંભીર પડકાર ઉભો કરી શકે છે. હાલ તો સમગ્ર ગુજરાત ગરમીના પ્રકોપ સામે લડી રહ્યું છે અને લોકો ક્યારે મેઘરાજાના આગમન સાથે ઠંડક મળે તેની રાહ જોઈ રહ્યા છે.