અમદાવાદના અતિ વ્યસ્ત એવા એસ.જી. હાઈવે પર આવેલા ઇસ્કોન બ્રિજ નજીક મિત્રતાને શર્મસાર કરતી એક સનસનાટીભરી ઘટના સામે આવી છે. અહીં એક યુવકે પોતાના જ મિત્રોને ઉછીના આપેલા રૂપિયા પાછા માંગતા, ઉશ્કેરાયેલા મિત્રોએ તેના પર છરી વડે આડેધડ ઘા ઝીંકી દઈ જીવલેણ હુમલો કર્યો હોવાનો ગંભીર આરોપ લાગ્યો છે. હુમલાની આ હિંસક ઘટનાને અંજામ આપ્યા બાદ તમામ હુમલાખોર મિત્રો ઘટનાસ્થળેથી ફરાર થઈ ગયા હતા. લોહીલુહાણ હાલતમાં ઇજાગ્રસ્ત યુવકને તાત્કાલિક અસરથી સારવાર અર્થે નજીકની હોસ્પિટલમાં ખસેડવામાં આવ્યો છે. આ સમગ્ર મામલે સેટેલાઇટ પોલીસે ગુનો નોંધી, ફરાર થઈ ગયેલા હુમલાખોરોને ઝડપી પાડવા માટે અલગ-અલગ દિશામાં તપાસના ચક્રો ગતિમાન કર્યા છે.