ગાંધીનગર જિલ્લા પોલીસને મંદિરોમાં થતી ચોરીના ગુનાઓ ઉકેલવામાં મોટી સફળતા મળી છે. પોલીસે રાત્રિના સમયે ધાર્મિક સ્થળોને નિશાન બનાવતી આંતરરાજ્ય ગેંગના રાજસ્થાનના ૩ સાગરીતોની ધરપકડ કરી છે. પ્રાથમિક પૂછપરછમાં ચોંકાવનારો ખુલાસો થયો છે કે, આ તસ્કરો પોતાના મોજશોખ અને વૈભવી જીવન જીવવા માટે મંદિરોમાં ચોરીની ઘટનાઓને અંજામ આપતા હતા. હાલ પોલીસે ગુનામાં વપરાયેલા મુદ્દામાલ અંગે તેમજ આ ટોળકીએ અન્ય કેટલા સ્થળોએ હાથફેરો કર્યો છે તે દિશામાં સઘન તપાસ શરૂ કરી છે.