છેલ્લા 24 કલાક દરમિયાન ગુજરાતના 172 તાલુકામાં નોંધપાત્ર વરસાદ વરસ્યો છે. સૌથી વધુ વરસાદ જૂનાગઢ જિલ્લાના માંગરોળમાં 12.64 ઇંચ નોંધાયો, જ્યારે ગીર સોમનાથના સૂત્રાપાડામાં 12.36 ઇંચ વરસાદ ખાબક્યો. જૂનાગઢના કેશોદમાં 10.94 ઇંચ અને ગીર સોમનાથના પાટણ-વેરાવળમાં 10.08 ઇંચ વરસાદ નોંધાતા અનેક વિસ્તારોમાં જળબંબાકાર જેવી સ્થિતિ સર્જાઈ હતી. ઉપરાંત માળીયા હાટીના અને માણાવદરમાં 9 ઇંચથી વધુ વરસાદ વરસ્યો. રાજ્યના કુલ 36 તાલુકામાં 2 ઇંચથી લઈને 12.5 ઇંચ સુધી વરસાદ નોંધાયો, જ્યારે 72 તાલુકામાં 1 ઇંચથી વધુ વરસાદ વરસતા ખાસ કરીને સૌરાષ્ટ્રમાં ચોમાસાએ જોરદાર બેટિંગ કરી છે.