સુરત : ભારે વરસાદ અને વિનાશક પૂરના કારણે પ્રભાવિત થયેલા સુરત શહેરના વિસ્તારોમાં પરિસ્થિતિને પૂર્વવત કરવા માટે ગુજરાત સરકારે યુદ્ધના ધોરણે રાહત અને બચાવ કામગીરીનો પ્રારંભ કર્યો છે. પૂરના પાણી ઓસરતાની સાથે જ જનજીવનને વેગ આપવા અને રાહત કાર્યોની પ્રગતિની વ્યક્તિગત સમીક્ષા કરવા માટે ગૃહ રાજ્ય મંત્રી હર્ષ સંઘવીએ મોડી રાત્રે વહીવટીતંત્ર, સુરત મહાનગરપાલિકા (SMC) અને સંકલન અધિકારીઓ સાથે એક ઉચ્ચ સ્તરીય ઇમરજન્સી બેઠક યોજી હતી. આ બેઠકમાં તેમણે પૂરના પાણીનો ત્વરિત નિકાલ, સમગ્ર વિસ્તારની સફાઈ અને આરોગ્ય સેવાઓને સર્વોચ્ચ પ્રાથમિકતા આપવાનો કડક નિર્દેશ આપ્યો છે.

હર્ષ સંઘવીએ વહીવટીતંત્રને અલ્ટીમેટમ આપતા જણાવ્યું છે કે, આગામી ૪૮ થી ૭૨ કલાકની અંદર તમામ અસરગ્રસ્ત વિસ્તારોમાં રોડ-રસ્તા ચાલુ કરી જનજીવન થાળે પાડવામાં આવે, જેથી કરીને સ્થાનિક બજારો અને ધંધાકીય પ્રવૃત્તિઓ ફરી ધમધમતી થાય. આ ઉપરાંત, પૂરના ગંદા પાણીથી ફેલાતા જીવલેણ રોગો અને રોગચાળાના જોખમને રોકવા માટે તાત્કાલિક ધોરણે ફોગિંગ અને વ્યાપક સ્વચ્છતા અભિયાન ચલાવી મેડિકલ કેમ્પ શરૂ કરવાની ખાસ સૂચનાઓ આપી છે.

પૂરપીડિતો માટે સરકારી સહાયનું માળખું:

·         કુલ થયેલો સર્વે: ૯,૧૦૦ થી વધુ પરિવારોના ઘરે-ઘરે જઈને સફળ કામગીરી.

·         તાત્કાલિક સહાય: ૮૦૦ થી વધુ અતિ અસરગ્રસ્ત પરિવારોને રોકડા ચૂકવાયા.

·         પરિવાર દીઠ રોકડ: ₹૬,૮૦૦ ની ઘરવખરી અને કેશ ડોલ્સ (Cash Dolls) ની ચૂકવણી.

·         બાકી પરિવારો: સર્વેની કામગીરી માટે અલગ-અલગ સ્પેશિયલ ટીમો મેદાનમાં.

બેઠક બાદ વિગતો આપતા તેમણે ઉમેર્યું હતું કે, માત્ર રહેણાંક વિસ્તારો જ નહીં, પરંતુ શહેરના પૂરથી પ્રભાવિત ૫૮ થી વધુ મુખ્ય શેરીઓ, માર્કેટો અને વ્યાપારી વિસ્તારોમાં નાની-મોટી દુકાનો તેમજ સ્થાનિક વ્યવસાયોને થયેલા આર્થિક નુકસાન અંગેનો સર્વે પણ સુપર ફાસ્ટ સ્પીડથી પૂર્ણ કરવામાં આવશે. આ વ્યાપારી સર્વેના રિપોર્ટના આધારે જ ટૂંક સમયમાં રાજ્ય સરકાર દ્વારા વેપારીઓ માટે વિશેષ આર્થિક રાહત પેકેજ અંગેનો મોટો નિર્ણય લેવામાં આવશે.

સુરતનો કોઈ નાગરિક આ આફતમાં સહાયથી વંચિત ન રહી જાય તે માટે એક અનોખી વ્યવસ્થા ઉભી કરાઈ છે. જો કોઈ વિસ્તાર અથવા હાઉસિંગ સોસાયટી ટેકનિકલ કે ભૌગોલિક કારણોસર સરકારી સર્વેમાંથી વંચિત રહી ગઈ હોય, તો તેવા નાગરિકો માટે કલેક્ટર કચેરી ખાતે એક વિશેષ પ્રભારી અધિકારીની નિમણૂક કરીને તાત્કાલિક હેલ્પલાઇન નંબર શરૂ કરવામાં આવ્યો છે. આ હેલ્પલાઇન પર ફરિયાદ મળતાં જ કંટ્રોલ રૂમ દ્વારા સર્વે કરવા માટે તાત્કાલિક ધોરણે એક સ્પેશિયલ ટીમ જે તે સોસાયટીમાં રવાના કરવામાં આવશે. રાજ્ય સરકાર, જિલ્લા પ્રશાસન અને સુરત મહાનગરપાલિકા પૂરપીડિતોના પુનર્વસન માટે સંપૂર્ણ કટિબદ્ધ છે.