અંબાજી:  યાત્રાધામ અંબાજીના આગામી ૨૫ વર્ષના ભવિષ્ય અને પ્રવાસીઓની સુવિધાઓને ધ્યાનમાં રાખીને રાજ્ય સરકાર દ્વારા મંજૂર કરાયેલા રૂ. ૧,૬૩૨ કરોડના મહત્વકાંક્ષી 'અંબાજી શક્તિ કોરિડોર પ્રોજેક્ટ' ને લઈને સ્થાનિક સ્તરે વિવાદનો મધપૂડો છંછેડાયો છે. આ પ્રોજેક્ટના પ્રથમ તબક્કાના ખાતમુહૂર્ત બાદ જમીન સંપાદન અને બજારના ડિમોલિશનને લઈને ફેલાયેલી વિવિધ અફવાઓના કારણે ગ્રામ પંચાયતના પદાધિકારીઓ અને સ્થાનિક રહેવાસીઓ તેમજ વેપારીઓ વચ્ચે ઉગ્ર ઘર્ષણ અને વિરોધ પ્રદર્શનોની સ્થિતિ સર્જાઈ છે.

આ વિવાદની વિગત એવી છે કે કોરિડોર પ્રોજેક્ટ અંતર્ગત મલ્ટી-લેવલ પાર્કિંગ, અંડરપાસ રોડ, યાત્રી નિવાસ પાથવે અને દિવ્ય દર્શન ચોક જેવી આધુનિક સુવિધાઓ બનાવવાનું આયોજન છે. જોકે, આ ભવ્ય બાંધકામો માટે અંબાજી મંદિરની આસપાસની વર્ષો જૂની દુકાનો, વ્યાપારી એકમો અને રહેણાંક મકાનો ઓથોરિટી દ્વારા હટાવી દેવામાં આવશે તેવી આશંકા સ્થાનિકો સેવાઈ રહ્યા છે. ગ્રામ પંચાયત દ્વારા યોગ્ય સંવાદ સાધવામાં ન આવતા સ્થાનિક લોકોએ પંચાયત કચેરી ખાતે જઈને ભારે સૂત્રોચ્ચાર કર્યા હતા અને આક્રોશ ઠાલવ્યો હતો.

બીજી તરફ, આ પ્રોજેક્ટને કારણે રોજગારી ગુમાવવાના ડરથી સ્થાનિક નાના વેપારીઓ અને આસપાસના આદિવાસી સમાજના લોકોમાં ભારે અસંતોષ છે. વહીવટી પ્રશાસન અને કલેક્ટર કચેરી દ્વારા જમીન સંપાદન અંગે ફેલાયેલી અફવાઓનો સત્તાવાર જવાબ આપવામાં આવ્યો હોવા છતાં, ગ્રામીણોનો આક્રોશ શાંત થવાનું નામ નથી લઈ રહ્યો. સ્થાનિક અગ્રણીઓનું કહેવું છે કે વિકાસના નામે સદીઓથી અહીં રહેતા મૂળ વતનીઓને બેઘર કે બેરોજગાર ન કરવા જોઈએ અને કોઈપણ પગલું ભરતા પહેલા સ્થાનિકોને વિશ્વાસમાં લેવા અનિવાર્ય છે.

મંત્રી પ્રવીણભાઈ માલી અને જયરામભાઈ ગામિત જેવા નેતાઓએ અગાઉ આ પ્રોજેક્ટને બનાસકાંઠા જિલ્લાના અર્થતંત્ર માટે નવો વેગ આપનારો અને રોજગારીની નવી તકો સર્જનારો ગણાવ્યો હતો. પરંતુ, વર્તમાન પરિસ્થિતિ જોતાં જો સરકાર અને સ્થાનિકો વચ્ચે ત્વરિત અને સકારાત્મક વાટાઘાટો નહીં થાય, તો આગામી સમયમાં આ વિરોધ વધુ ઉગ્ર બને તેવી પૂરેપૂરી સંભાવના છે. પવિત્ર યાત્રાધામમાં કાયદો અને વ્યવસ્થાની સ્થિતિ ન બગડે તે માટે પોલીસ પ્રશાસન પણ હાલ સમગ્ર ગતિવિધિઓ પર ચાંપતી નજર રાખી રહ્યું છે.