ગાંધીનગર, તા. ૧૪: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા ધોરણ ૧૦ અને ૧૨ના પરિણામો બાદ હવે વિદ્યાર્થીઓ માટે વધુ એક મોટા સમાચાર સામે આવ્યા છે. આ વર્ષે વિદ્યાર્થીઓને જે મૂળ માર્કશીટ મળવાની છે, તેમાં બોર્ડ દ્વારા ધરમૂળથી ફેરફાર કરવામાં આવ્યા છે. અત્યાર સુધી જે પરંપરાગત માર્કશીટ જોવા મળતી હતી, તેના સ્થાને હવે રાષ્ટ્રીય સ્તરના CBSE બોર્ડ જેવી આધુનિક અને હાઈ-સિક્યુરિટી ફીચર્સ ધરાવતી ડિજિટલ માર્કશીટ વિદ્યાર્થીઓના હાથમાં આવશે.
 
નામની ગોઠવણીમાં ‘ગ્લોબલ’ ફેરફાર
નવી માર્કશીટમાં સૌથી મોટો ફેરફાર વિદ્યાર્થીના નામની ગોઠવણીમાં થયો છે. વર્ષોથી ચાલી આવતી ‘અટક-નામ-પિતાનું નામ’ની પદ્ધતિને બદલે હવે પ્રથમ વિદ્યાર્થીનું નામ અને ત્યારબાદ અટક દર્શાવવામાં આવશે. આ ફેરફાર ખાસ કરીને વિદેશ અભ્યાસ માટે જવા માંગતા વિદ્યાર્થીઓ માટે આશીર્વાદરૂપ સાબિત થશે, કારણ કે પાસપોર્ટ અને આંતરરાષ્ટ્રીય દસ્તાવેજોમાં નામની વિસંગતતાને કારણે થતી મુશ્કેલીઓ હવે ભૂતકાળ બની જશે.
 
QR કોડ: નકલી માર્કશીટના ખેલ ખતમ
સુરક્ષાની દૃષ્ટિએ બોર્ડ દ્વારા ‘માસ્ટરસ્ટ્રોક’ મારવામાં આવ્યો છે. અત્યાર સુધી માર્કશીટ પર જે હોલોગ્રામ સ્ટીકર આવતું હતું, તેને દૂર કરીને તેના સ્થાને હાઈ-સિક્યુરિટી QR કોડ મૂકવામાં આવ્યો છે. કોઈપણ સંસ્થા કે યુનિવર્સિટી માત્ર આ કોડ સ્કેન કરીને માર્કશીટની સત્યતાની તપાસ કરી શકશે. આ ટેક્નોલોજીને કારણે નકલી માર્કશીટ બનાવવાનું હવે અશક્ય બની જશે.
 
નવી સાઈઝ અને આકર્ષક લુક
આ વર્ષની માર્કશીટ સામાન્ય કરતા સાઈઝમાં થોડી મોટી અને નવા કલર કોમ્બિનેશન સાથે જોવા મળશે. તેમાં વિદ્યાર્થીનું નામ, પિતાનું નામ અને અટક માટે અલગ-અલગ કોલમ (મથાળા) આપવામાં આવ્યા છે, જેથી વિગતો વધુ સ્પષ્ટ રીતે વાંચી શકાય. બોર્ડના અધિકારીઓના જણાવ્યા અનુસાર, માર્કશીટ તૈયાર કરવાની પ્રક્રિયા પૂર્ણતાના આરે છે અને આગામી ૧ અઠવાડિયાની અંદર તમામ શાળાઓમાં તેનું વિતરણ શરૂ કરી દેવામાં આવશે.
 
વિદ્યાર્થીઓને શું થશે ફાયદો?
•    સરળ વેરીફિકેશન: ડોક્યુમેન્ટ વેરીફિકેશન સમયે હવે લાંબી રાહ જોવી નહીં પડે.
•    સરકારી દસ્તાવેજોમાં સરળતા: પાસપોર્ટ, આધાર કાર્ડ કે પાન કાર્ડ સાથે નામની વિસંગતતા દૂર થશે.
•    રાષ્ટ્રીય સ્તરની ઓળખ: ગુજરાતના વિદ્યાર્થીઓની માર્કશીટ હવે અન્ય રાજ્યોના બોર્ડની સમકક્ષ ગણાશે.
શિક્ષણ જગતમાં આવેલા આ આધુનિક બદલાવને વાલીઓ અને શિક્ષણશાસ્ત્રીઓએ આવકાર્યો છે. આગામી દિવસોમાં જ્યારે વિદ્યાર્થીઓ આ નવી ‘હાઈટેક’ માર્કશીટ મેળવશે, ત્યારે ગુજરાતના શિક્ષણ બોર્ડના ઇતિહાસમાં એક નવું પ્રકરણ ઉમેરાશે.