મહીસાગર જિલ્લાની 19 વર્ષીય દુષ્કર્મ પીડિતાને ગુજરાત હાઈકોર્ટ તરફથી મોટી રાહત મળી છે. પીડિતાના 24 અઠવાડિયા અને 4 દિવસના ગર્ભને હાઈકોર્ટે તબીબી પ્રક્રિયા હેઠળ સમાપ્ત કરવાની મંજૂરી આપી છે. કોર્ટના આદેશ બાદ હવે ગોધરાની GMERS હોસ્પિટલમાં તબીબોની દેખરેખ હેઠળ ગર્ભપાતની પ્રક્રિયા હાથ ધરવામાં આવશે.

હાઈકોર્ટે ગોધરાની GMERS હોસ્પિટલને જરૂરી તબીબી વ્યવસ્થા કરવા અને નિષ્ણાત તબીબોની ટીમની રચના કરીને તાત્કાલિક પ્રક્રિયા હાથ ધરવા નિર્દેશ આપ્યો છે. કેસની ગંભીરતાને ધ્યાનમાં રાખીને પીડિતાની સલામતી અને સ્વાસ્થ્યને સર્વોચ્ચ પ્રાથમિકતા આપવા કોર્ટ દ્વારા સૂચના આપવામાં આવી છે.

આ કેસમાં મેડિકલ પેનલ દ્વારા પીડિતાની તબીબી સ્થિતિનું મૂલ્યાંકન કરવામાં આવ્યું હતું. પેનલે રજૂ કરેલા અભિપ્રાય મુજબ, હાલની પરિસ્થિતિમાં ગર્ભપાત તબીબી રીતે શક્ય અને સુરક્ષિત હોવાનું જણાવાયું હતું. આ મેડિકલ અભિપ્રાયને ધ્યાનમાં રાખીને હાઈકોર્ટે ગર્ભ સમાપ્ત કરવાની મંજૂરી આપી છે.

કોર્ટે નોંધ્યું કે દુષ્કર્મના પરિણામે રહેલો અનિચ્છનીય ગર્ભ પીડિતાના માનસિક સ્વાસ્થ્ય પર ગંભીર અસર કરી શકે છે. આવી સ્થિતિને માનસિક સ્વાસ્થ્ય માટે ગંભીર ઈજા સમાન ગણાવીને કોર્ટ દ્વારા પીડિતાની શારીરિક સાથે માનસિક સ્થિતિને પણ મહત્વ આપવામાં આવ્યું છે.

કેસમાં પુરાવાની દૃષ્ટિએ મહત્વપૂર્ણ આદેશ આપતાં હાઈકોર્ટે ગર્ભના DNA સેમ્પલ વૈજ્ઞાનિક પદ્ધતિથી સાચવવા નિર્દેશ આપ્યો છે. આ સેમ્પલ તપાસ અધિકારીને સોંપવાનો પણ આદેશ કરવામાં આવ્યો છે, જેથી આગળની તપાસ અને કાયદાકીય પ્રક્રિયામાં તેનો ઉપયોગ થઈ શકે.

હાઈકોર્ટે એવી સ્થિતિને પણ ધ્યાનમાં લીધી છે કે જો બાળક જીવિત જન્મે તો તેને શ્રેષ્ઠ તબીબી સારવાર આપવામાં આવે. જરૂરિયાત ઊભી થાય તો બાળકની સારવાર અને સંભાળની જવાબદારી રાજ્ય સરકાર સંભાળશે, તેવો પણ કોર્ટ દ્વારા નિર્દેશ આપવામાં આવ્યો છે.