ગાંધીનગર તા.૨૦ :  રાજ્યના ખેડૂતોના હિતમાં ગુજરાત સરકારે ઐતિહાસિક નિર્ણય લીધો છે. વાવણીના પાકને બચાવવા અને ઉનાળુ સિઝનમાં સિંચાઈની સમસ્યા દૂર કરવા માટે હવે ખેતીવાડી માટે 8 કલાકને બદલે સળંગ 10 કલાક વીજળી આપવામાં આવશે. સરકારની આ જાહેરાતથી રાજ્યના લાખો ખેડૂતોને સીધો લાભ થશે.

સરકારના જણાવ્યા મુજબ ચાલુ વાવણી સિઝનમાં વરસાદની અનિશ્ચિતતા અને પાણીની અછતને ધ્યાનમાં રાખીને આ નિર્ણય લેવામાં આવ્યો છે. 10 કલાક સળંગ વીજળી મળવાથી ખેડૂતો પોતાના પાકને સમયસર પાણી આપી શકશે અને પાકને નુકસાન થતું અટકશે. ખાસ કરીને કપાસ, મગફળી અને શાકભાજીના પાક માટે આ નિર્ણય ખૂબ ફાયદાકારક સાબિત થશે.

વીજ વિભાગના અધિકારીઓએ જણાવ્યું કે સળંગ 10 કલાકનો વીજ પુરવઠો ગોઠવવા માટે ગ્રીડ અને સબસ્ટેશન પર વધારાનો ભાર મૂક્યા વિના શેડ્યુલ તૈયાર કરવામાં આવ્યું છે. ખેડૂતોને સમયસર અને પૂરતો વોલ્ટેજ મળી રહે તેની પણ કાળજી રાખવામાં આવશે. આ નિર્ણય તાત્કાલિક અમલમાં મુકવામાં આવ્યો છે.

ખેડૂત આગેવાનોએ સરકારના આ નિર્ણયને આવકાર્યો છે. તેમનું કહેવું છે કે 8 કલાકના સ્લોટમાં પાકને પૂરતું પાણી આપવું મુશ્કેલ હતું. હવે 10 કલાક સળંગ વીજળી મળવાથી ડીઝલનો ખર્ચ ઘટશે અને પાકની ઉપજમાં પણ વધારો થશે. સરકારની આ પહેલથી રાજ્યની ખેતીવાડીને નવી દિશા મળશે.