અમદાવાદ  : ગુજરાત હાઈકોર્ટ દ્વારા એક મહત્વપૂર્ણ કેસમાં નામ અને ધર્મ બદલવાની સાથે સત્તાવાળાઓને જાણ કર્યા વિના પાસપોર્ટ ફ્રોડ કરવાના આરોપનો સામનો કરી રહેલા એક વ્યક્તિને જામીન પર મુક્ત કરવાનો આદેશ આપવામાં આવ્યો છે. કોર્ટે પ્રાથમિક તબક્કે એવું નોંધીને જામીન મંજૂર કર્યા હતા કે આરોપીએ પોતાનું નામ બદલ્યા બાદ અન્ય કોઈ નવો ગુનો આચર્યો નથી. આ વ્યક્તિ દ્વારા ભારતીય ન્યાય સંહિતા (BNS) ની કલમ ૩૩૬(૨), ૩૩૬(૩), ૩૩૮(૨), ૩૪૦(૨) તેમજ પાસપોર્ટ એક્ટની કલમ ૧૨(૧)(બ) હેઠળ નોંધાયેલી એફઆઈઆરના સંદર્ભમાં જામીન અરજી કરવામાં આવી હતી.

પાસપોર્ટ એક્ટની કલમ ૧૨(૧)(બ) હેઠળ કોઈપણ વ્યક્તિ પાસપોર્ટ કે મુસાફરી દસ્તાવેજ મેળવવા માટે ખોટી માહિતી આપે અથવા જરૂરી માહિતી છુપાવે, કે પછી કાયદેસરની સત્તા વગર પાસપોર્ટની એન્ટ્રીઓમાં ફેરફાર કરવાનો પ્રયાસ કરે તો તેને શિક્ષાપાત્ર ગુનો ગણવામાં આવે છે.

આ કેસની વિગતો મુજબ, અરજદાર કે જે અગાઉ હિન્દુ ધર્મ પાળતા હતા, તેમણે કથિત રીતે નકલી નિકાહનામાના આધારે એક મુસ્લિમ યુવતી સાથે લગ્ન કર્યા હતા. ત્યારબાદ તેમને પાસપોર્ટની જરૂરિયાત ઊભી થતાં તેમણે તેના માટે અરજી કરી હતી, પરંતુ તેમનો અગાઉનો પાસપોર્ટ જૂના હિન્દુ નામ પર હતો. પાસપોર્ટ સત્તાવાળાઓ દ્વારા આ બાબતની જાણ પોલીસને કરવામાં આવતા આ નવો ગુનો નોંધાયો હતો.

સરકારી વકીલો (પ્રોસિક્યુશન) નો દાવો હતો કે અરજદાર દ્વારા સંબંધિત સત્તાવાળાઓને જાણ કર્યા વગર જ પોતાનો ધર્મ બદલી નાખવામાં આવ્યો હતો અને ત્યારબાદ આધાર કાર્ડ, પાન કાર્ડ, રેશન કાર્ડ, ચૂંટણી કાર્ડ તેમજ અન્ય દસ્તાવેજો મેળવી લેવામાં આવ્યા હતા.

આ કેસની સુનાવણી દરમિયાન હાઈકોર્ટના ન્યાયાધીશ હસમુખભાઈ સુથારે પોતાના આદેશમાં નોંધ્યું હતું કે, "આ એક નિર્વિવાદ અને સ્વીકૃત હકીકત છે કે વર્તમાન અરજદારે પોતાની ઓળખ છુપાવીને નામ બદલ્યું છે. જો કે, નામ બદલ્યા બાદ તેમણે ન તો કોઈ ગુનો આચર્યો છે અને ન તો કોઈ ગેરકાયદેસર પ્રવૃત્તિમાં સંડોવણી દાખવી છે. અબ્દુલ રહેમાન ખાનના નામે કે યોગેન્દ્ર કુમાર મૌર્યના નામે અગાઉ કોઈ ગુનો નોંધાયેલો નથી. વર્તમાન અરજદારે માત્ર પાસપોર્ટ માટે અરજી કરી હતી, જેના પગલે આ કથિત ઘટના પ્રકાશમાં આવી હતી."

અદાલતે વધુમાં ઉમેર્યું હતું કે કેસની હકીકતો અને સંજોગોને ધ્યાનમાં રાખીને તથા એફઆઈઆર કરવામાં આવેલા આક્ષેપોની પ્રકૃતિને જોતા, પુરાવાઓની વિસ્તૃત ચર્ચા કર્યા વગર, પ્રાથમિક દ્રષ્ટિએ આ અદાલતનું માનવું છે કે અરજદારને ઉત્તરોત્તર નિયમિત જામીન પર મુક્ત કરવા માટે આ યોગ્ય કેસ છે.

આ સાથે જ હાઈકોર્ટ દ્વારા કેટલીક ચોક્કસ શરતોને આધીન આરોપીને જામીન પર મુક્ત કરવાનો આદેશ આપવામાં આવ્યો છે.