રાજકોટ: ગુજરાત રાજ્યમાં છેલ્લા ઘણા દિવસોથી સતત વરસી રહેલા મેઘરાજાએ આખરે વિરામ લીધો છે. હવામાન વિભાગ દ્વારા સવારે દસ થી બપોરના એક વાગ્યા સુધીના સમયગાળા માટે કરવામાં આવેલી નવી આગાહીમાં રાજ્યના કોઈપણ જિલ્લામાં રેડ એલર્ટ જાહેર કરવામાં આવ્યું નથી જે તમામ નાગરિકો માટે એક ખૂબ જ મોટી રાહતની વાત બની છે. હવામાન વિભાગની આગાહી મુજબ હવે માત્ર કચ્છ અને બનાસકાંઠા જિલ્લામાં જ ભારે વરસાદની સંભાવના દર્શાવતું ઓરેન્જ એલર્ટ આપવામાં આવ્યું છે. જ્યારે ઉત્તર અને મધ્ય ગુજરાત તેમજ દક્ષિણ ગુજરાતના કુલ તેર જેટલા જિલ્લાઓમાં મધ્યમ વરસાદની આગાહી સાથે યલો એલર્ટ અપાયું છે. આ સિવાય રાજ્યના બાકીના તમામ જિલ્લાઓમાં વરસાદનું જોર ઘટશે અને સામાન્ય વાદળછાયું વાતાવરણ જળવાઈ રહેશે તેવી શક્યતા છે.