મહેસાણા, તા.૦૪: મહેસાણા જિલ્લાના વડનગર સ્થિત સિવિલ હોસ્પિટલના પરિસરમાં ગઈકાલે બનેલી આત્મહત્યાની ઘટનાએ આજે એવું ભયાનક સ્વરૂપ ધારણ કર્યું છે કે જે સાંભળીને પથ્થર દિલના માણસની આંખો પણ ભીની થઈ જાય. ગઈકાલે હોસ્પિટલના ચોથા માળેથી કૂદીને આત્મહત્યા કરનાર ગીરીશ પરમાર નામના યુવકના મૃત્યુ બાદ પોલીસને જે સ્યુસાઈડ નોટ મળી છે, તેણે સમગ્ર ગુજરાતને હચમચાવી દીધું છે. આ કેસ હવે માત્ર આત્મહત્યા નથી રહ્યો, પરંતુ છ મહિના જૂના બેરહેમ ડબલ મર્ડરનો કાળો સચ સામે લાવ્યો છે.
મૃતક ગીરીશ બાબુલાલ પરમારે તેના જીવનના અંતિમ શ્વાસ લેતા પહેલા લખેલી સ્યુસાઈડ નોટમાં એવી કબૂલાત કરી છે કે તેણે અંદાજે છ મહિના પહેલા જ પોતાની પત્ની અને માસૂમ દીકરીની કરપીણ હત્યા કરી નાખી હતી. પકડાઈ જવાની બીકે તેણે આ બંનેના મૃતદેહો ક્યાંય ફેંકવાને બદલે પોતાના જ ઘરના ઓરડામાં દાટી દીધા હતા. આ ખુલાસો થતા જ પોલીસના ઉચ્ચ અધિકારીઓ ઘટનાસ્થળે દોડી આવ્યા હતા અને આખા મામલાની ગંભીરતા જોઈ સ્તબ્ધ થઈ ગયા હતા.
શાહપુર ગામે પોલીસ છાવણીમાં ફેરવાયું, FSLની મદદ લેવાશે
આ ઘટસ્ફોટ થતાની સાથે જ મહેસાણા પોલીસનો મોટો કાફલો વડનગરના શાહપુર (વડ) ગામે ગીરીશના બંધ મકાને પહોંચ્યો છે. જ્યાં મૃતદેહો દાટ્યા હોવાની કબૂલાત કરવામાં આવી છે તે જગ્યાને સીલ કરી દેવામાં આવી છે. અત્યારે મેજિસ્ટ્રેટની હાજરીમાં અને FSL (ફોરેન્સિક સાયન્સ લેબોરેટરી)ની ટીમ સાથે રાખીને ઘરની અંદર ખોદકામ કરવાની તૈયારીઓ ચાલી રહી છે. લાંબા સમયથી લાશ દટાયેલી હોવાથી હવે તેમાંથી માત્ર કંકાલ મળવાની શક્યતા છે, જેનું ડીએનએ ટેસ્ટિંગ પણ કરવામાં આવશે.
સવાલ એ છે કે... કેમ?
એક પિતા જે પોતાની દીકરી અને પત્નીનો રક્ષક હોય છે, તે કઈ હદે માનસિક રીતે તૂટી ગયો હશે કે તેણે આટલું ઘાતકી પગલું ભર્યું? પોલીસ અત્યારે પારિવારિક કંકાસ, આર્થિક સંકડામણ કે અન્ય કોઈ ગુપ્ત કારણોસર આ હત્યાઓ થઈ હોવાની દિશામાં તપાસ કરી રહી છે. છ મહિના સુધી પાડોશીઓ કે સંબંધીઓને કેમ શંકા ન ગઈ, તે પણ એક મોટો પ્રશ્ન છે. હાલમાં આ વિચિત્ર અને ભયાનક કિસ્સાએ સમગ્ર પંથકમાં ભય અને ચર્ચાઓનું જોર પકડ્યું છે.