વાપી : (જીતેન્દ્ર રૂપારેલિયા) રાજ્યમાં વરસાદનો નવો દોર જામી પડ્યો છે. છેલ્લા ૨૪ કલાકમાં ૨૪૦ તાલુકામાં વરસાદ નોંધાયો છે. કપરાડામાં સૌથી વધુ ૪.૪૫ ઇંચ વરસાદ વરસ્યો હતો. આજે દક્ષિણ ગુજરાત, સૌરાષ્ટ્ર અને કચ્છના કેટલાક વિસ્તારોમાં ભારેથી અતિભારે વરસાદની આગાહી સાથે ગાજવીજ અને પ્રતિ કલાક ૩૦થી ૪૦ કિલોમીટરની ઝડપે પવન ફૂંકાવાની સંભાવના છે.

રાજ્યમાં લાંબા વિરામ બાદ મેઘરાજાએ ફરી જોરદાર જમાવટ કરતાં દક્ષિણ ગુજરાતથી લઈને સૌરાષ્ટ્ર, ઉત્તર અને મધ્ય ગુજરાત સુધી વરસાદી માહોલ છવાયો છે. રાજ્ય આપત્તિ સંચાલન કેન્દ્રના સત્તાવાર આંકડા અનુસાર ૧૩ સપ્ટેમ્બરની સવારે ૬ વાગ્યાથી ૧૪ સપ્ટેમ્બરની સવારે ૬ વાગ્યા સુધીના ૨૪ કલાક દરમિયાન રાજ્યના ૨૪૦ તાલુકામાં ઝાપટાંથી લઈને ૪.૪૫ ઇંચ સુધી વરસાદ નોંધાયો હતો. રાજ્યના ૨૭ તાલુકામાં બે ઇંચથી વધુ વરસાદ વરસ્યો હોવાનું જાણવા મળે છે.

વલસાડ જિલ્લો વરસાદનું મુખ્ય કેન્દ્ર રહ્યો હતો. કપરાડામાં રાજ્યનો સૌથી વધુ ૧૧૩ મિલીમીટર એટલે કે ૪.૪૫ ઇંચ વરસાદ વરસ્યો હતો. નાનાપોંઢામાં ૯૦ મિલીમીટર એટલે કે ૩.૫૪ ઇંચ, ધરમપુરમાં ૮૭ મિલીમીટર એટલે કે ૩.૪૩ ઇંચ, વાપીમાં ૭૯ મિલીમીટર એટલે કે ૩.૧૧ ઇંચ અને ઉમરગામમાં ૬૯ મિલીમીટર એટલે કે ૨.૭૨ ઇંચ વરસાદ નોંધાયો હતો.

ભરૂચ જિલ્લાના વાલિયામાં ૯૭ મિલીમીટર એટલે કે ૩.૮૨ ઇંચ અને ઝઘડિયામાં ૬૩ મિલીમીટર વરસાદ પડ્યો હતો. બોટાદ જિલ્લાના બરવાળામાં ૮૬ મિલીમીટર એટલે કે ૩.૩૯ ઇંચ તથા રાણપુરમાં ૬૭ મિલીમીટર વરસાદ નોંધાયો હતો. મહેસાણાના બેચરાજીમાં ૮૫ મિલીમીટર એટલે કે ૩.૩૫ ઇંચ અને નવસારીના વાંસદામાં ૮૩ મિલીમીટર એટલે કે ૩.૨૭ ઇંચ વરસાદ વરસ્યો હતો.

સુરતના ઉમરપાડામાં ૭૭ મિલીમીટર, સુરેન્દ્રનગરના ચૂડામાં ૭૨ મિલીમીટર, નર્મદાના ગરુડેશ્વરમાં ૭૦ મિલીમીટર અને ડેડિયાપાડામાં ૬૧ મિલીમીટર વરસાદ નોંધાયો હતો. દાહોદમાં ૬૬ મિલીમીટર અને અમદાવાદ જિલ્લાના ધંધુકામાં ૫૪ મિલીમીટર વરસાદ પડ્યો હતો. ખેડા, કપડવંજ અને માતર તાલુકામાં પણ આશરે ૬૧થી ૬૫ મિલીમીટર વરસાદ નોંધાયો હતો.

હવામાન વિભાગની આગાહી પ્રમાણે આજે ભરૂચ, સુરત અને નવસારી જિલ્લામાં છૂટાછવાયા સ્થળોએ અતિભારે વરસાદ પડી શકે છે. જામનગર, પોરબંદર, જૂનાગઢ, દેવભૂમિ દ્વારકા, ગીર સોમનાથ અને દીવમાં પણ અતિભારે વરસાદની સંભાવના છે. અમદાવાદ, આણંદ, નર્મદા, તાપી, ડાંગ અને વલસાડ ઉપરાંત સુરેન્દ્રનગર, રાજકોટ, અમરેલી, ભાવનગર, મોરબી, બોટાદ અને કચ્છમાં છૂટાછવાયા સ્થળોએ ભારે વરસાદની આગાહી કરવામાં આવી છે.

રાજ્યભરમાં ગાજવીજ સાથે પ્રતિ કલાક ૩૦થી ૪૦ કિલોમીટરની ઝડપે પવન ફૂંકાઈ શકે છે. ભારે વરસાદને કારણે નીચાણવાળા વિસ્તારોમાં પાણી ભરાવા, માર્ગવ્યવહારને અસર થવા અને નદી-નાળામાં પાણીનું સ્તર અચાનક વધવાની શક્યતા હોવાથી લોકોને સાવચેતી રાખવા સૂચના આપવામાં આવી છે.