મહેસાણા  જિલ્લાના કડી શહેરમાં ગતરોજ પડેલા ભારે વરસાદના કારણે જનજીવન પ્રભાવિત થયું છે. શહેરમાં અનેક નીચાણવાળા વિસ્તારોમાં પાણી ભરાઈ જવાથી મુખ્ય માર્ગો પર વાહનચાલકોને ભારે હાલાકીનો સામનો કરવો પડ્યો હતો, જેના પરિણામે લાંબો ટ્રાફિકજામ સર્જાયો હતો.

વરસાદી પાણી અને ટ્રાફિકની વિકટ પરિસ્થિતિને ધ્યાનમાં રાખીને ગુજરાતના પૂર્વ નાયબ મુખ્યમંત્રી નીતિનભાઈ પટેલ તાત્કાલિક અસરથી સ્થળ પર પહોંચ્યા હતા. તેમણે જાતે જ અસરગ્રસ્ત વિસ્તારોનું નિરીક્ષણ કર્યું હતું.

સ્થળ પર પહોંચ્યા બાદ નીતિનભાઈ પટેલે ડીવાયએસપી (DySP) સહિતના સ્થાનિક પોલીસ અધિકારીઓ સાથે એક મહત્વપૂર્ણ બેઠક કરી હતી. આ સમીક્ષા દરમિયાન તેમણે ટ્રાફિક વ્યવસ્થાને કેવી રીતે સુચારુ બનાવવી અને પાણીના નિકાલ માટે શું વ્યવસ્થા કરી શકાય, તે અંગે અધિકારીઓને જરૂરી સૂચનાઓ આપી હતી.

સ્થાનિક નાગરિકોને ટ્રાફિક અને પાણી ભરાવાની સમસ્યાથી મુક્તિ મળે તે માટે તંત્રને સક્રિય થઈ કામ કરવા તાકીદ કરવામાં આવી છે. હાલમાં તંત્ર દ્વારા પાણીના નિકાલની કામગીરી અને ટ્રાફિકને નિયંત્રિત કરવાના પ્રયાસો હાથ ધરવામાં આવ્યા છે