દક્ષિણ ગુજરાતમાં ચાલી રહેલી મેઘમહેર વચ્ચે તાપી જિલ્લામાંથી એક અત્યંત રાહત અને આનંદના સમાચાર સામે આવ્યા છે. તાપી જિલ્લાના સોનગઢ તાલુકામાં આવેલા ઐતિહાસિક અને પ્રખ્યાત ડોસવાડા ડેમમાં નવા નીરની આવક થવાને કારણે આ ડેમ સિઝનમાં ફરી એકવાર ઓવરફ્લો થઈ ગયો છે.

ડેમ છલકાવાની આ શાનદાર ઘટનાને કારણે સ્થાનિક ખેડૂતો અને પશુપાલકોમાં ભારે ખુશીની લહેર ફેલાઈ ગઈ છે, કારણ કે આ પાણી આગામી દિવસોમાં ખેતી અને પશુપાલન માટે ખૂબ જ ઉપયોગી સાબિત થશે.

ચાલુ ચોમાસાની સિઝનમાં ડોસવાડા ડેમ ફરીથી ઓવરફ્લો થતાં ખેડૂતોના ચહેરા પર હાસ્ય જોવા મળી રહ્યું છે. સમયસર પૂરતા પ્રમાણમાં પાણી ઉપલબ્ધ થવાથી આગામી પાક માટે સિંચાઈની ચિંતા મોટા પ્રમાણમાં હળવી થઈ ગઈ છે. ખેડૂતોનું માનવું છે કે આ પાણી ખેતીની કાયાપલટ કરવામાં મહત્વની ભૂમિકા ભજવશે.

ડેમ  ઓવરફ્લો થવાની આ સુંદર ક્ષણ જોવા માટે આસપાસના વિસ્તારોમાંથી પ્રવાસીઓ અને સ્થાનિક લોકો પણ મોટી સંખ્યામાં ઉમટી પડ્યા છે.

 ડેમની સપાટી વધવાથી અને ઓવરફ્લો થવાની સ્થિતિને ધ્યાનમાં રાખીને વહીવટી તંત્ર દ્વારા સંપૂર્ણ સાવચેતી રાખવામાં આવી રહી છે.

સુરક્ષાના ભાગરૂપે ડોસવાડા ડેમની આસપાસના નીચાણવાળા 12 જેટલા ગામોને હાઈ એલર્ટ પર રાખવામાં આવ્યા છે. તંત્ર દ્વારા નદી કિનારે કે નીચાણવાળા વિસ્તારોમાં ન જવા માટે નાગરિકોને સૂચના આપવામાં આવી છે જેથી કોઈપણ પ્રકારની અનિચ્છનીય ઘટનાથી બચી શકાય.