હવામાન વિભાગ દ્વારા વલસાડ જિલ્લામાં ભારે વરસાદની આપવામાં આવેલી ચેતવણી બાદ સ્થાનિક તંત્ર સંપૂર્ણપણે એલર્ટ મોડમાં આવી ગયું છે. ખાસ કરીને ઔરંગા નદીનું જળસ્તર વધવાની શક્યતાઓને જોતાં નદી કિનારે આવેલા 6 ગામોને સાવચેત કરી એલર્ટ જાહેર કરવામાં આવ્યું છે. પરિસ્થિતિનો તાગ મેળવવા માટે ઉચ્ચ અધિકારીઓએ રૂબરૂ પ્રભાવિત વિસ્તારોની મુલાકાત લીધી હતી. પૂરની ગંભીર સ્થિતિ સર્જાય તે પહેલાં જ તંત્ર દ્વારા સાવચેતીના ભાગરૂપે અત્યાર સુધીમાં 800 જેટલા નાગરિકોને સુરક્ષિત સ્થળોએ સ્થળાંતરિત કરવામાં આવ્યા છે.