વડગામ,તા.૪: બનાસકાંઠા જિલ્‍લાના વડગામ તાલુકાના છાપી પોલીસ સ્‍ટેશન હદ વિસ્‍તારમાં આવેલા તેનીવાડા ગામેથી ટ્રિપલ તલાક (ત્રણ તલાક)નો એક ગંભીર મામલો સામે આવ્‍યો છે. લગ્નજીવનના સામાન્‍ય પારિવારિક વિવાદ બાદ પતિએ પોતાની પત્‍નીને વોટ્‍સએપ મેસેજ દ્વારા ત્રણ તલાક આપી દીધા હોવાની ચોંકાવનારી ઘટના સામે આવતા આ વિસ્‍તારમાં ચકચાર મચી જવા પામી છે. આ મામલે પીડિત મહિલાએ છાપી પોલીસ મથકે પહોંચીને પોતાના પતિ સામે કાયદેસરની ફરિયાદ નોંધાવી છે.

પ્રાપ્ત માહિતી અનુસાર, તેનીવાડા ગામની આ મહિલાના લગ્ન થોડા સમય પહેલાં થયા હતા. શરૂઆતમાં બધું સામાન્‍ય હતું, પરંતુ સમય જતાં ઘરમાં પારિવારિક અણબનાવ શરૂ થયા હતા. પોલીસ ફરિયાદમાં જણાવ્‍યા મુજબ, પીડિત મહિલાના સસરાને વહુ પસંદ ન હતી અને તેઓ આ સંબંધથી નાખુશ હતા. સસરાની આ નારાજગી અને દબાણના કારણે પતિએ પોતાની પત્‍નીથી દુરી બનાવવાનું શરૂ કરી દીધું હતું અને તેને પોતાના ઘરે અવારનવાર બોલાવવાનું કે રાખવાનું બંધ કરી દીધું હતું.

પરિસ્‍થિતિ વધુ વણસતા મામલો સમાધાન સુધી પહોંચવાને બદલે અમાનવીય અને ગેરકાયદેસર તરફ વળ્‍યો હતો. પતિએ પારિવારિક મતભેદોનો અંત લાવવાના રચનાત્‍મક રસ્‍તા અપનાવવાને બદલે સીધો જ સોશિયલ મીડિયાનો સહારો લીધો હતો. પતિએ વોટ્‍સએપ પર મેસેજ મોકલીને પત્‍નીને એકસાથે ત્રણ તલાક આપી દીધા હતા.

સામાજિક દબાણ અને પતિના આ અમાનવીય કૃત્‍યથી ભાંગી પડવાને બદલે પીડિત મહિલાએ કાયદાનો સહારો લેવાનું નક્કી કર્યું હતું. તેણે હિમત દાખવીને પોતાના પરિવારજનો સાથે છાપી પોલીસ સ્‍ટેશનનો સંપર્ક કર્યો હતો. મહિલાની અરજી અને રજૂઆતના આધારે છાપી પોલીસે ગંભીરતા દાખવીને તાત્‍કાલિક ધોરણે કાયદેસરની કાર્યવાહીના ચક્રો ગતિમાન કર્યા છે.

ઉલ્‍લેખનીય છે કે ભારતમાં 'મુસ્‍લિમ મહિલા (લગ્ન અધિકાર સંરક્ષણ) અધિનિયમ' હેઠળ ત્રણ તલાક (ટ્રિપલ તલાક) આપવાની પ્રથાને ગેરકાયદેસર અને દંડનીય અપરાધ જાહેર કરવામાં આવી છે. આ કાયદા મુજબ મૌખિક, લેખિત કે ઇલેક્‍ટ્રોનિક માધ્‍યમ (જેવા કે વોટ્‍સએપ, એસએમએસ કે ઈમેલ) દ્વારા અપાતા ત્રણ તલાક કાયદાકીય રીતે શૂન્‍ય ગણાય છે અને તેમાં પતિ સામે સખત જેલની સજાની જોગવાઈ છે જેથી મહિલાની ફરિયાદના આધારે ગુનો નોંધીને આગળની સઘન તપાસ શરૂ કરવામાં આવી છે. પોલીસ દ્વારા ટેક્રિકલ પુરાવાઓ (વોટ્‍સએપ ચેટ અને મેસેજ)ની ચકાસણી કરવામાં આવી રહી છે.

આ ઘટનાએ ફરી એકવાર સામાજિક માનસિકતા અને કાયદાના કડક અમલીકરણની જરૂરિયાત પર સવાલો ઊભા કર્યા છે, ત્‍યારે પીડિત મહિલાને ન્‍યાય મળે છે કે નહીં તેના પર સૌની નજર રહેશે.