ગુજરાત સરકાર દ્વારા રાજ્યના વહિવટી તંત્રમાં મહત્વપૂર્ણ ફેરફારો કરવામાં આવ્યા છે. રાજ્યના બે વરિષ્ઠ IAS અધિકારીઓની બદલી કરીને તેમને નવી જવાબદારીઓ સોંપવામાં આવી છે. આ ફેરફારોને વહીવટી કામગીરીને વધુ અસરકારક અને ગતિશીલ બનાવવાના પ્રયાસ તરીકે જોવામાં આવી રહ્યા છે.

વર્ષ 2004 બેચના IAS અધિકારી રૂપવંત સિંઘ હાલમાં Gujarat Mineral Development Corporation (GMDC)ના મેનેજિંગ ડિરેક્ટર તરીકે ફરજ બજાવી રહ્યા હતા. હવે રાજ્ય સરકારે તેમની નિમણૂક રાજ્ય કર વિભાગના ચીફ કમિશનર ઓફ સ્ટેટ ટેક્સ તરીકે કરી છે. જોકે, GMDCના મેનેજિંગ ડિરેક્ટર તરીકેનો વધારાનો ચાર્જ પણ તેમની પાસે યથાવત રાખવામાં આવ્યો છે, જેના કારણે તેઓ બંને મહત્વપૂર્ણ જવાબદારીઓ સંભાળશે.

વર્ષ 2010 બેચના IAS અધિકારી આલોક કુમાર પાંડે, જેઓ અત્યાર સુધી રાહત કમિશનર તરીકે સેવા આપી રહ્યા હતા, તેમને હવે આદિજાતિ વિકાસ કમિશનર તરીકે નિયુક્ત કરવામાં આવ્યા છે. આ પદ પર રહી તેઓ રાજ્યના આદિવાસી વિસ્તારોમાં વિકાસલક્ષી યોજનાઓના અમલીકરણ, શિક્ષણ અને આરોગ્ય સેવાઓના વિસ્તરણ તેમજ રોજગારી સંબંધિત કાર્યક્રમોના સંકલનમાં મહત્વની ભૂમિકા ભજવશે.

રાજ્ય સરકારના આ નિર્ણયને વહીવટી દૃષ્ટિએ મહત્વપૂર્ણ માનવામાં આવી રહ્યો છે. બંને અધિકારીઓ તેમના અનુભવ અને કાર્યક્ષમતાના આધારે નવા વિભાગોમાં કામગીરીને વધુ મજબૂત બનાવશે તેવી અપેક્ષા વ્યક્ત કરવામાં આવી રહી છે. આગામી દિવસોમાં તેમની નવી નિમણૂકોના પરિણામે સંબંધિત વિભાગોની કામગીરીમાં વધુ ઝડપ અને અસરકારકતા જોવા મળી શકે છે