વડોદરા :કુખ્યાત આતંકી સંગઠન જૈશ-એ-મોહમ્મદના પકડાયેલા આતંકીઓનું નેટવર્ક વડોદરા સુધી ફેલાયેલું હોવાનો ઘટસ્ફોટ થયો છે. સુરક્ષા એજન્સીઓ દ્વારા અગાઉ પકડવામાં આવેલા 13 આતંકીઓ પૈકીના કેટલાક તાર વડોદરા સાથે જોડાયેલા હોવાની માહિતી મળતા જ સુરક્ષા દળો સક્રિય થઈ ગયા છે. આતંકી પ્રવૃત્તિઓ સાથે સંકળાયેલા શખ્સો શહેરના હાર્દસમા વિસ્તારમાં આવેલા સ્થળો પર રોકાયા હોવાની વાત બહાર આવતા જ સ્થાનિક વહીવટી તંત્ર અને નાગરિકોમાં ગંભીર ચિંતાનો માહોલ છવાઈ ગયો છે.

પ્રાપ્ત વિગતો અનુસાર, પકડાયેલા જૈશના આતંકીઓ પૈકીના બે શખ્સો વડોદરા આવ્યા હતા અને અહીં કાશ્મીરથી પણ એક અન્ય આતંકીને વિશેષરૂપે બોલાવવામાં આવ્યો હતો. આ તમામ આતંકીઓએ શહેરના સયાજીગંજ વિસ્તારમાં આવેલી એમ્બેસેડર હોટલમાં એકાંતમાં ગુપ્ત બેઠક યોજીને કોઈ મોટા અપરાધ કે ષડયંત્રની વ્યુહરચના ઘડી હોવાની માહિતી તપાસમાં બહાર આવી છે. પાલનપુરના ભાગલ ગામથી કડી અને વડોદરા સુધી આ નેટવર્ક જોડાયેલું હોવાનું ખુલ્યું છે. આતંકી અહમદ ગાજિવાલા અને ઇબ્રાહિમ ઘઘા નામના શખ્સો દ્વારા આતંકીઓ સાથે મુલાકાત કરીને આખી ગેમ પ્લાન કરવામાં આવી હોવાની આશંકા વ્યક્ત કરવામાં આવી રહી છે.

આ સમગ્ર વિવાદ અંગે હોટલ સંચાલકો અને મેનેજરે TV13 સમક્ષ સ્પષ્ટતા કરતા જણાવ્યું હતું કે આતંકીઓ હોટલમાં આવ્યા હોવાની વાતથી તેઓ તદ્દન અજાણ હતા. ATS ની ટીમ તપાસ માટે આવી ત્યારે આ બાબતનો પર્દાફાશ થયો હતો કે આતંકીઓ સીધા જ સર્વન્ટ રૂમમાં જઈને ફ્રેશ થઈને જતા રહ્યા હતા. પૂર્વ સ્ટાફ કર્મચારીનો મિત્ર હોવાના કારણે હોટલ સ્ટાફે તેમની કોઈ પણ પ્રકારની સત્તાવાર નોંધણી કે એન્ટ્રી રજિસ્ટરમાં નહોતી કરી. સવારના આશરે 8 વાગ્યે આવીને તે વ્યક્તિ જતો રહ્યો હોવાનું અને સ્ટાફ ક્વાર્ટરમાં રોકાવા છતાં તેની કોઈ માહિતી મેનેજમેન્ટ પાસે ન હોવાનું સામે આવ્યું છે, જેનાથી હોટલ સ્ટાફની ભૂમિકા સામે પણ શંકાની સોય તાકવામાં આવી છે.

આતંકીઓ જેવા અતિસંવેદનશીલ અને વોન્ટેડ શખ્સો કોઈપણ પ્રકારની ઓળખ કે એન્ટ્રી વગર હોટલના પરિસરમાં આરામથી રોકાઈને જતા રહે તે સુરક્ષા વ્યવસ્થા પર સીધા સવાલો ઊભા કરે છે. આ સમગ્ર મામલે હોટલના માલિક અને સંચાલકોની ભૂમિકા અત્યંત શંકાસ્પદ હોવાનું જણાઈ રહ્યું છે, જેને લઈને ATS દ્વારા ઊંડાણપૂર્વક અને સઘન તપાસ શરૂ કરવામાં આવી છે. જો કે, પ્રાથમિક તપાસમાં સર્વન્ટ રૂમમાંથી કોઈ વાંધાજનક વસ્તુ મળી આવી નથી તેમ છતાં આતંકી નેટવર્ક અને સ્થાનિક મદદગારોને શોધી કાઢવા માટે પોલીસે કડક કાનૂની કાર્યવાહીના ચક્રો ગતિમાન કર્યા છે.