રાતનપુર (શંખેશ્વર): પાટણ જિલ્લાના શંખેશ્વર તાલુકાના રાતનપુર ગામ પાસે મોડી રાત્રે એક કાળજું કંપાવનારો માર્ગ અકસ્માત સર્જાયો હતો. પુરપાટ ઝડપે જતી એક કેટીએમ (KTM) સ્પોર્ટ્સ બાઇક અને પેસેન્જર રિક્ષા વચ્ચે સામસામે પ્રચંડ ટક્કર થઈ હતી. આ દુર્ઘટનામાં બે વ્યક્તિઓના ઘટનાસ્થળે જ કમકમાટીભર્યા મોત નીપજ્યાં હતા. ટક્કર એટલી જોરદાર હતી કે રિક્ષા અને બાઇક બંનેનો કચ્ચરઘાણ નીકળી ગયો હતો, જેના પગલે આસપાસના લોકો દોડી આવ્યા હતા.

અકસ્માતને પગલે રિક્ષામાં સવાર અન્ય મુસાફરોને પણ નાની-મોટી ઇજાઓ પહોંચી છે. સ્થાનિકોની મદદથી તમામ ઇજાગ્રસ્તોને તાત્કાલિક અસરથી સારવાર માટે નજીકની હોસ્પિટલમાં ખસેડવામાં આવ્યા છે. બનાવની જાણ થતા જ શંખેશ્વર પોલીસનો કાફલો ઘટનાસ્થળે પહોંચી ગયો હતો અને મૃતદેહોને પોસ્ટમોર્ટમ માટે મોકલી આગળની કાયદેસરની કાર્યવાહી હાથ ધરી હતી. મોડી રાત્રે બનેલી આ ઘટનાને કારણે હાઇવે પર ટ્રાફિક જામના દ્રશ્યો પણ સર્જાયા હતા.

બીજી તરફ, મધર્સ ડેના પવિત્ર દિવસે જ પાલનપુરમાં એક હૃદયદ્રાવક ઘટના સામે આવી છે. અહીં ખેતરના સેઢેથી એક અજાણી મહિલાએ પોતાની નવજાત બાળકીને ત્યજી દીધી હોવાનું જાણવા મળ્યું છે. ખેતરેથી પરત ફરી રહેલા એક નાગરિકની નજર પડતા આ માસૂમનો જીવ બચાવી શકાયો હતો. હાલમાં આ બાળકી પોલીસ અને આરોગ્ય વિભાગની દેખરેખ હેઠળ છે, જ્યારે પોલીસે આ નિર્દયી માતાની શોધખોળ શરૂ કરી છે.