ગાંધીનગર : ગુજરાતની રાજ્યધાની ગાંધીનગર સ્થિત જાણીતી કર્ણાવતી યુનિવર્સિટી ખાતે શુક્રવારે 'જેનેસિસ નેક્સ્ટજેન સ્ટાર્ટઅપ સમિટ' (Genesis NextGen Startup Summit) ના ગાંધીનગર એડિશનનું અત્યંત સફળતાપૂર્વક આયોજન કરવામાં આવ્યું હતું. આ ખાસ સમિટમાં દેશભરમાંથી ઊભરતા સ્ટાર્ટઅપ સ્થાપકો, અનુભવી રોકાણકારો, ઉદ્યોગજગતના પ્રતિનિધિઓ, વરિષ્ઠ સરકારી અધિકારીઓ અને શિક્ષણવિદો એક વિશાળ મંચ પર એકત્રિત થયા હતા. સમિટનો મુખ્ય ઉદ્દેશ્ય નવીન ટેક્નોલોજી, ડીપ-ટેક ઇનોવેશન અને સ્ટાર્ટઅપ્સને માર્કેટ સાથે જોડવાનો રહ્યો હતો.

આ ભવ્ય સમિટનું આયોજન ભારત સરકારના ઇલેક્ટ્રોનિક્સ અને માહિતી ટેકનોલોજી મંત્રાલય હેઠળના 'MeitY સ્ટાર્ટઅપ હબ' ના સહયોગથી કર્ણાવતી યુનિવર્સિટી અને કર્ણાવતી ઇનોવેશન એન્ડ ઇન્ક્યુબેશન ફાઉન્ડેશન (KIIF) દ્વારા સંયુક્ત રીતે કરવામાં આવ્યું હતું. સમગ્ર કાર્યક્રમ દરમિયાન ડીપ-ટેક ઇનોવેશન, સ્વદેશી હાર્ડવેર નિર્માણ, સેમિકન્ડક્ટર પ્રોડક્શન અને ઇલેક્ટ્રોનિક્સ મેન્યુફેક્ચરિંગ જેવા ઉભરતા અને અત્યાધુનિક ક્ષેત્રોમાં રહેલી વિપુલ તકો તથા પડકારો અંગે વિસ્તૃત ચર્ચાઓ કરવામાં આવી હતી.

સમિટ અંતર્ગત આયોજિત વિશેષ સ્ટાર્ટઅપ પ્રદર્શન, નિષ્ણાતોના સત્રો અને પૅનલ ચર્ચાઓએ પ્રવાસીઓ અને યુવા સંશોધકોમાં ભારે ઉત્સાહ જગાડ્યો હતો. ખાસ કરીને 'જેનેસિસ આઈડિયા વર્લ્ડ' નામના પોસ્ટર પ્રેઝન્ટેશન મંચ દ્વારા અનેક ઇનોવેટર્સ અને સ્ટાર્ટઅપ્સને પોતાના અનોખા વિચારો અને સોલ્યુશન્સ સીધા જ રોકાણકારો તથા ઉદ્યોગ સાહસિકો સમક્ષ રજૂ કરવાની ઉત્કૃષ્ટ તક સાંપડી હતી.

આ કાર્યક્રમમાં ગુજરાત સરકારના શિક્ષણ વિભાગના અધિક મુખ્ય સચિવ મુકેશ કુમાર મુખ્ય અતિથિ તરીકે વિશેષ ઉપસ્થિત રહ્યા હતા. ઉદ્યોગ વિભાગના સંયુક્ત કમિશનર આર. ડી. બરહટ્ટે 'સ્ટાર્ટઅપ ગુજરાત' થીમ હેઠળ રાજ્યના સશક્ત ઇનોવેશન ઇકોસિસ્ટમ વિશે વિગતવાર માહિતી આપી હતી, જ્યારે MeitY સ્ટાર્ટઅપ હબના CEO ડૉ. પનીરસેલ્વમ મદનગોપાલે સ્ટાર્ટઅપ્સને સરકારી યોજનાઓ અને પ્રોત્સાહન પૂરા પાડવામાં MSH ની મહત્વપૂર્ણ ભૂમિકા પર પ્રકાશ પાડ્યો હતો.

કર્ણાવતી યુનિવર્સિટીના પ્રમુખ રિતેશ હાડાએ સમિટ અંગે પોતાનો પ્રતિભાવ આપતા જણાવ્યું હતું કે, "કોઈપણ ટેક્નોલોજી આધારિત સ્ટાર્ટઅપને માત્ર વિચાર માત્રથી સફળ બનાવી શકાતું નથી. તેના માટે ઉદ્યોગજ્ઞાન, યોગ્ય માર્ગદર્શન અને યોગ્ય રોકાણની જરૂર રહે છે. જેનેસિસ જેવો મંચ ઇનોવેટર્સને તેમના વિચારોને વાસ્તવિક બજારની જરૂરિયાતો અનુસાર ઢાળવામાં મદદરૂપ બને છે. કર્ણાવતી યુનિવર્સિટી આવા આયોજનોને શિક્ષણ અને ઉદ્યોગસાહસિકતા વચ્ચેની એક મહત્વપૂર્ણ કડી તરીકે જોવે છે."