અમદાવાદ તા.૧૧: મુખ્‍યમંત્રી  ભૂપેન્‍દ્રભાઈ પટેલે રાજ્‍યમાં નવી રચાયેલી નવ મહાનગરપાલિકાઓને મજબૂત બનાવીને નાગરિકોને ઝડપી અને ગુણવત્તાસભર પ્રાથમિક સુવિધાઓ ઉપલબ્‍ધ કરાવવા એક મહત્‍વપૂર્ણ ઐતિહાસિક નિર્ણય કર્યો છે.

મુખ્‍યમંત્રી ભૂપેન્‍દ્રભાઈ પટેલે રાજ્‍યની નગરપાલિકાઓને આવા લાભ આપવાના  અગાઉ કરેલા નિર્ણયમાં હવે આ નવી ૯ મહાનગરપાલિકાઓનો પણ સમાવેશ કરવામાં આવ્‍યો છે.

આ નિર્ણય અનુસાર રાજ્‍યની વાપી, મહેસાણા, પોરબંદર, મોરબી, ગાંધીધામ, નડિયાદ, આણંદ, નવસારી અને સુરેન્‍દ્રનગર એમ નવી રચાયેલી કુલ ૯ મહાનગરપાલિકાઓને આગામી પાંચ વર્ષ સુધી જાહેર હિતની વિવિધ ૧૧ જેટલી આવશ્‍યક નાગરિક સુવિધાઓ ઊભી કરવા માટે જરૂરી સરકારી જમીન વિનામૂલ્‍યે ફાળવવામાં આવશે.

આ મહાનગરપાલિકાઓ અગાઉની ‘‘અ''વર્ગની નગરપાલિકાઓમાંથી નવી મહાનગરપાલિકા બનેલી છે અને તેનો હાલ ટ્રાન્‍ઝિશન ફેઈઝ ચાલે છે. એટલું જ નહીં, નવી મહાનગરપાલિકાઓની હદમાં પણ મોટો વિસ્‍તાર ઉમેરાયો છે. આ સંદર્ભમાં મુખ્‍યમંત્રી ભૂપેન્‍દ્રભાઈ પટેલે

 નવી મહાનગરપાલિકાઓમાં સર્વાંગી વિકાસ કામો ઝડપથી થઈ શકે તે હેતુસર જિલ્‍લા કક્ષાએ જમીન ફાળવણીની પ્રક્રિયા વધુ સરળ બનાવવાનો અભિગમ અપનાવ્‍યો છે.

મુખ્‍યમંત્રી  ભૂપેન્‍દ્રભાઈ પટેલે નવી મહાનગરપાલિકાઓને નાગરિક સુખાકારી માટે જે ૧૧ મહત્‍વના જાહેર પ્રોજેક્‍ટ્‍સ માટે વિનામૂલ્‍યે જમીન ઉપલબ્‍ધ કરાવવાનો નિર્ણય કર્યો છે તેમાં નગર સેવા સદન (કચેરી મકાન), ફાયર સ્‍ટેશન, સુએઝ ટ્રીટમેન્‍ટ પ્‍લાન્‍ટ (STP), વોટર ટ્રીટમેન્‍ટ પ્‍લાન્‍ટ (WTP), ભૂગર્ભ ગટર ડ્રેનેજ, પંપિગ સ્‍ટેશન, વોટર સપ્‍લાય પ્રોજેક્‍ટ (પાણી પુરવઠાના કામો), સોલિડ/લિક્‍વિડ વેસ્‍ટ મેનેજમેન્‍ટ પ્‍લાન્‍ટ, સ્‍ટોર્મ વોટર ડ્રેનેજની કામગીરી (વરસાદી પાણીના નિકાલ માટે), બાલવાડી (આંગણવાડી) તેમજ ટાઉન હોલ, કોમ્‍યુનિટી હોલ અને કન્‍વેન્‍શન સેન્‍ટરનો સમાવેશ થાય છે.

મુખ્‍યમંત્રી ભૂપેન્‍દ્રભાઈ પટેલના આ દુરોગામી નિર્ણયને પરિણામે નવી મહાનગરપાલિકાઓના વિસ્‍તારોમાં ફાયર સ્‍ટેશન, એસ.ટી.પી., સોલિડ વેસ્‍ટ મેનેજમેન્‍ટ અને જાહેર બાગ બગીચા જેવી બેઝિક ઇન્‍ફ્રાસ્‍ટ્રક્‍ચર ફેસિલિટીઝનું ત્‍વરાએ નિર્માણ થઈ શકશે તથા શહેરી વિકાસ કામોમાં પણ નવી ગતિ આવશે.