વડોદરાના સુપ્રસિદ્ધ સયાજીબાગ પ્રાણીસંગ્રહાલયમાં એક ચોંકાવનારી ઘટના સામે આવી છે, જેમાં ત્રણ યુવકોએ દીપડાના પાંજરામાં કૂદીને વન્યજીવની પજવણી કરી હતી. આ સમગ્ર ઘટનાની રીલ બનાવી સોશિયલ મીડિયા પર વાયરલ કરવામાં આવતા વહીવટી તંત્ર સફાળું જાગ્યું છે.ઝૂ ક્યુરેટરની ફરિયાદના આધારે સયાજીગંજ પોલીસે કાયદેસરની કાર્યવાહી હાથ ધરી છે.

વડોદરાનું સયાજીબાગ ઝૂ પ્રવાસીઓ માટે આકર્ષણનું કેન્દ્ર છે, પરંતુ તાજેતરમાં સોશિયલ મીડિયા પર વાયરલ થયેલા એક વીડિયોએ સુરક્ષા વ્યવસ્થા સામે અનેક સવાલો ઉભા કર્યા છે. વાયરલ વીડિયોમાં જોઈ શકાય છે કે ત્રણ યુવકો તમામ નિયમોને નેવે મૂકીને દીપડાના પ્રતિબંધિત વાડામાં અંદર સુધી પ્રવેશ કરે છે. માત્ર સોશિયલ મીડિયા પર સસ્તી પ્રસિદ્ધિ મેળવવા અને 'રીલ્સ' બનાવવાના મોહમાં આ યુવકોએ દીપડાની પજવણી કરી હતી. વન્યજીવ સંરક્ષણ ધારા હેઠળ પ્રાણીઓને હેરાન કરવા કે તેમના પાંજરામાં પ્રવેશવો એ ગંભીર ગુનો છે. આ વીડિયો સત્તાધીશોના ધ્યાને આવતા જ સયાજીબાગ ઝૂના ક્યુરેટર દ્વારા તાત્કાલિક અસરથી સયાજીગંજ પોલીસ મથકમાં ત્રણેય યુવકો વિરુદ્ધ ફરિયાદ નોંધાવવામાં આવી છે.

પોલીસે આ મામલે ગુનો નોંધીને વીડિયોના આધારે યુવકોની ઓળખ કરવાની તજવીજ શરૂ કરી છે. પ્રાથમિક તપાસમાં જાણવા મળ્યું છે કે આ યુવકોએ પ્રતિબંધિત વિસ્તારમાં અનધિકૃત રીતે પ્રવેશ કર્યો હતો અને વન્ય પ્રાણીના જીવને જોખમમાં મૂકવાની સાથે પોતાની સુરક્ષાની પણ પરવા કરી નહોતી. ઝૂ પ્રશાસન દ્વારા જણાવવામાં આવ્યું છે કે ભવિષ્યમાં આવી ઘટનાઓ ન બને તે માટે સુરક્ષા વ્યવસ્થા વધુ સજ્જ કરવામાં આવશે. વડોદરા પોલીસ હાલમાં ટેકનિકલ સર્વેલન્સ અને સોશિયલ મીડિયા પ્રોફાઇલના આધારે આ 'રીલબાજ' યુવકોની શોધખોળ કરી રહી છે. વન્યજીવ પ્રેમીઓમાં પણ આ ઘટનાને લઈને ભારે રોષ જોવા મળી રહ્યો છે, અને જવાબદારો સામે કડકમાં કડક કાર્યવાહી કરવાની માંગ ઉઠી છે.