મહેસાણા જિલ્લા વહીવટી તંત્રમાં શિસ્ત અને પ્રોટોકોલના ભંગને લઈને એક મોટો વહીવટી નિર્ણય સામે આવ્યો છે. સરકારી અધિકારીઓ માટે નિયત કરાયેલા ડ્રેસ કોડ અને ગરિમાનું પાલન ન કરવા બદલ મહેસાણાના અધિક કલેક્ટર મયંક પટેલે કડક વલણ અપનાવ્યું છે. તેમણે શિસ્તભંગના આ મામલાને ગંભીરતાથી લઈને એક ઉચ્ચ અધિકારી સામે સીધા પગલાં ભર્યા છે.

અધિક કલેક્ટર મયંક પટેલ દ્વારા મહેસાણાના ડેપ્યુટી કમિશનર દર્શનસિંહ ચાવડાને સત્તાવાર રીતે કારણદર્શક નોટિસ ફટકારવામાં આવી છે. આ નોટિસ મળતા જ સરકારી વર્તુળોમાં ભારે ચર્ચા જાગી છે. ઉચ્ચ હોદ્દા પર હોવા છતાં નિયમોનું ઉલ્લંઘન કરવા બદલ વહીવટી તંત્ર દ્વારા આ આકરી કાર્યવાહી કરવામાં આવી છે.

મળતી માહિતી મુજબ, જિલ્લા કલેક્ટરની અધ્યક્ષતામાં યોજાતી મહત્વની વહીવટી બેઠકોમાં ડેપ્યુટી કમિશનર દર્શનસિંહ ચાવડા પ્રોફેશનલ કપડાંને બદલે કેઝ્યુઅલ ટી-શર્ટ પહેરીને  હાજર રહેતા હતા. એક ઉચ્ચ અધિકારી તરીકે સત્તાવાર મિટિંગોમાં આ પ્રકારનો પહેરવેશ શિસ્તની વિરુદ્ધ હોવાનું વરિષ્ઠ અધિકારીઓના ધ્યાને આવ્યું હતું. તેઓ વારંવાર આવી બેઠકોમાં ટી-શર્ટ પહેરીને જ આવતા હોવાથી આખરે તંત્રએ શિસ્ત જાળવવા માટે તેમને સત્તાવાર નોટિસ પાઠવી ખુલાસો માંગ્યો છે.