મહેસાણા, તા. 17  : મહેસાણા લોકલ ક્રાઈમ બ્રાન્ચે કડી શહેરમાં મોટી કાર્યવાહી કરીને રહેણાંક વિસ્તારમાં ચાલતી ડુપ્લીકેટ વિદેશી દારૂની ફેક્ટરીનો પર્દાફાશ કર્યો છે. LCBની ટીમે બાતમીના આધારે કડીના સોસાયટી વિસ્તારમાં આવેલા એક મકાનમાં દરોડો પાડીને 15 લાખ રૂપિયાથી વધુની કિંમતનો મુદ્દામાલ કબજે કર્યો છે. આ કેસમાં મુખ્ય સૂત્રધાર સહિત ત્રણ આરોપીઓની ધરપકડ કરવામાં આવી છે.

LCB પીઆઈને મળેલી ચોક્કસ બાતમીના આધારે પોલીસે શુક્રવારે રાત્રે કડીના આનંદનગર વિસ્તારમાં આવેલા મકાનમાં છાપો માર્યો હતો. તપાસ દરમિયાન મકાનમાંથી મોટા પ્રમાણમાં સ્પિરિટ ભરેલા કેરબા, ખાલી બોટલો, અલગ અલગ બ્રાન્ડના સ્ટીકર, ઢાંકણા, કોટન બોક્સ અને પેકિંગ મટિરિયલ મળી આવ્યું હતું. આરોપીઓ બહારથી સસ્તા ભાવે સ્પિરિટ લાવીને તેમાં કેમિકલ અને પાણીનું મિશ્રણ કરીને ડુપ્લીકેટ વિદેશી દારૂ બનાવતા હતા. તૈયાર થયેલ દારૂને બ્રાન્ડેડ કંપનીની બોટલમાં ભરીને સ્ટીકર લગાવીને વેચવામાં આવતો હતો.

પોલીસે ઘટનાસ્થળેથી 250 લિટર સ્પિરિટ, 300થી વધુ ખાલી બોટલો, 5000 સ્ટીકર, ઢાંકણા પેક કરવાના મશીન સહિતનો મુદ્દામાલ જપ્ત કર્યો છે. પકડાયેલા આરોપીઓની પૂછપરછમાં સામે આવ્યું છે કે આ ડુપ્લીકેટ દારૂ મહેસાણા, ગાંધીનગર અને અમદાવાદના બુટલેગરોને સપ્લાય કરવામાં આવતો હતો. એક બોટલ 800થી 1200 રૂપિયામાં વેચાતી હતી જ્યારે બનાવટ ખર્ચ માત્ર 100 રૂપિયા આસપાસ થતો હતો.

LCBએ જણાવ્યું કે રહેણાંક વિસ્તારમાં ફેક્ટરી ચલાવીને આરોપીઓ લોકોના આરોગ્ય સાથે ચેડા કરતા હતા. ભેળસેળવાળો દારૂ પીવાથી જીવલેણ અસર થઈ શકે છે. પકડાયેલા ત્રણેય આરોપીઓ સામે પ્રોહિબિશન એક્ટ સહિતની કલમો હેઠળ ગુનો નોંધીને વધુ તપાસ હાથ ધરવામાં આવી છે. આ નેટવર્ક સાથે સંકળાયેલા અન્ય શખ્સોને પકડવા માટે તપાસનો ધમધમાટ શરૂ કરવામાં આવ્યો છે.