અમદાવાદ:ગુજરાત રાજ્યના ગાંધીનગર સ્થિત સીઆઈડી ક્રાઈમ અને રેલ્વેઝની એન્ટી નાર્કોટિક્સ ટાસ્ક ફોર્સ (ANTF) દ્વારા માદક પદાર્થોના વેચાણ વિરુદ્ધ એક મોટી અને સફળ કાર્યવાહી કરવામાં આવી છે. અમદાવાદના બોપલ પોલીસ સ્ટેશન વિસ્તારમાં આવેલા એક ફ્લેટમાં દરોડો પાડીને લાખો રૂપિયાની કિંમતના પ્રતિબંધિત ડ્રગ્સ અને વિદેશી દારૂના જથ્થા સાથે એક શખ્સને રંગેહાથ ઝડપી પાડવામાં આવ્યો છે.

 

બાતમીના આધારે ફ્લેટમાં દરોડો:

એએનટીએફ અમદાવાદ ઝોનની ટીમને મળેલી ચોક્કસ અને સંયુક્ત બાતમીના આધારે ૧૬/૦૪/૨૦૨૬ના રોજ બોપલ વિસ્તારમાં આવેલા આરોહી વીવીઆના ફ્લેટમાં કાર્યવાહી હાથ ધરવામાં આવી હતી. પોલીસ સબ ઈન્સ્પેક્ટર એમ એન આદરેજીયા, હેડ કોન્સ્ટેબલ એડવીન એલેક્ઝાંડર અને પોલીસ કોન્સ્ટેબલ હિતેશકુમાર રામજીભાઈને મળેલી માહિતી મુજબ, ફ્લેટ નંબર બી/૧૨૦૩માં ગેરકાયદેસર પ્રવૃત્તિ ચાલી રહી હતી. આ માહિતીના આધારે ટીમે દરોડો પાડતા સ્થળ પરથી મોટા પ્રમાણમાં નશીલા પદાર્થો મળી આવ્યા હતા.

 

ઝડપાયેલ આરોપી અને જપ્ત મુદ્દામાલ:

પોલીસે સ્થળ પરથી ૪૨ વર્ષીય નિશાંત ભનુભાઇ સોલંકીને ઝડપી લીધો છે. તે મૂળ રાજકોટના કાલાવાડ રોડ પર આવેલા જ્યોતિનગરનો રહેવાસી છે. તેની પાસેથી નીચે મુજબનો મુદ્દામાલ જપ્ત કરવામાં આવ્યો છે:

  ૧૦૨.૫૯ ગ્રામ એમડી ડ્રગ્સ (મેથાએમ્ફેટામાઇન), જેની કિંમત આશરે ૧૦,૨૫,૯૦૦ રૂપિયા થાય છે.

  ૮.૮૮ ગ્રામ કોકેઈન, જેની કિંમત આશરે ૪,૪૪,૦૦૦ રૂપિયા છે.

  ૪૬.૬૪ ગ્રામ હાઈબ્રીડ ગાંજો, જેની કિંમત ૧,૬૩,૨૪૦ રૂપિયા અંકાય છે.

  ૬ બોટલ વિદેશી દારૂ અને ૨૪ બીયરના ટીન.

  ૪ નંગ મોબાઈલ ફોન (કિંમત ૧,૫૦,૦૦૦ રૂપિયા) અને અન્ય સામગ્રી.

   આમ, કુલ મળીને અંદાજે ૧૮,૦૧,૩૧૦ રૂપિયાનો મુદ્દામાલ પોલીસ દ્વારા કબજે કરવામાં આવ્યો છે.

 

અન્ય ચાર શખ્સો સામે પણ ગુનો નોંધાયો:

તપાસ દરમિયાન આ ગુનામાં અન્ય ચાર લોકોની સંડોવણી પણ બહાર આવી છે, જેઓ હાલ પકડવાના બાકી છે. જેમાં અદાણી શાંતિગ્રામ (અડાલજ) ખાતે રહેતા રીક અને સાંડ્રા, દિલ્હીનો ઘોસ્ટ (જેનો નાઈજીરીયન વોટ્સએપ નંબર છે) અને અમદાવાદના મેમ્કો વિસ્તારનો અજય પટેલ સામેલ છે.

 

પોલીસ ટીમની કામગીરી:

આ સમગ્ર ઓપરેશન ઈન્ચાર્જ પોલીસ અધિક્ષક વિવેક ભેડાની સૂચના અને નાયબ પોલીસ અધીક્ષક કે ડી ખાંભલાના સીધા માર્ગદર્શન હેઠળ પાર પાડવામાં આવ્યું હતું. આ ટીમમાં પીઆઈ એન બી ડોડીયા, પીએસઆઈ એમ એન આદરેજીયા, પીએસઆઈ આર ડી સોલંકી, હેડ કોન્સ્ટેબલ એડવીન એલેક્ઝાંડર, તેમજ કોન્સ્ટેબલ હિતેશકુમાર, નીરવભાઈ, કૌશીકભાઈ, હર્ષદભાઈ, જયેશભાઈ, કેવલદાન ગઢવી અને વુમન પોલીસ કોન્સ્ટેબલ રીટાબેન વિનોદભાઈનો સમાવેશ થાય છે.

આ મામલે નિશાંત સોલંકી અને અન્ય આરોપીઓ વિરુદ્ધ એનડીપીએસ એક્ટની કલમ ૮(સી), ૨૦(બી), ૨૧(બી), ૨૨(સી), ૨૯ અને પ્રોહિબીશન એક્ટની વિવિધ કલમો હેઠળ ગુનો નોંધી આગળની તપાસ બોપલ પોલીસ સ્ટેશનને સોંપવામાં આવી છે.