અમદાવાદના રામોલ વિસ્તારમાં આવેલી ફટાકડા ફેક્ટરીમાં થયેલા વિસ્ફોટની ગંભીર દુર્ઘટના બાદ અમદાવાદ મ્યુનિસિપલ કોર્પોરેશન (AMC) દ્વારા વ્યાપક મેગા ફાયર સેફ્ટી ડ્રાઇવ હાથ ધરવામાં આવી છે. આ ઝુંબેશ હેઠળ AMC અને AUDA વિસ્તારમાં આવેલા કુલ 299 જેટલા એકમોની આકસ્મિક તપાસ કરવામાં આવી હતી, જેમાં કાર્યવાહીના ડરથી અનેક એકમોના માલિકો સ્થળ પરથી ફરાર થઈ ગયા હોવાનું સામે આવ્યું હતું. માત્ર 19 જુલાઈના રોજ જ 147 એકમોનું ચેકિંગ હાથ ધરીને ફાયર સેફ્ટીના નિયમોનો ભંગ કરવા બદલ 30 એકમોને નોટિસ ફટકારવામાં આવી હતી તેમજ ગેરકાયદેસર રીતે રાખવામાં આવેલો ફટાકડાનો મોટો જથ્થો જપ્ત કરી તેનો યોગ્ય નિકાલ કરવામાં આવ્યો હતો.