રાજકોટ: રાજ્યમાં છેલ્લા કેટલાક દિવસોથી પડી રહેલી કાળઝાળ ગરમી વચ્ચે હવે લોકોને આંશિક રાહત મળવાની શક્યતા વ્યક્ત કરવામાં આવી છે. પવનોની દિશામાં ફેરફાર થવાને કારણે આગામી દિવસોમાં ગરમીનું પ્રમાણ ઘટશે. જોકે હજુ પણ અનેક શહેરોમાં પારો ૪૦ ડિગ્રીની પાર છે.

રાજ્યમાં છેલ્લા ઘણા દિવસોથી આકાશમાંથી અગનગોળા વરસતા હોય તેવી સ્થિતિ સર્જાઈ છે, જેના કારણે સામાન્ય જનજીવન ભારે પ્રભાવિત થયું છે. બપોરના સમયે રસ્તાઓ પર કર્ફ્યુ જેવો માહોલ જોવા મળી રહ્યો છે અને લોકો કામ સિવાય ઘરની બહાર નીકળવાનું ટાળી રહ્યા છે. 

આ કાળઝાળ ગરમી વચ્ચે હવામાન વિભાગ દ્વારા એક રાહતના સમાચાર આપવામાં આવ્યા છે. તાજેતરની સત્તાવાર આગાહી મુજબ, પવનોની દિશામાં થયેલા ફેરફારને કારણે આગામી કેટલાક દિવસોમાં મહત્તમ તાપમાનમાં એકથી બે ડિગ્રી સુધીનો ઘટાડો નોંધાઈ શકે છે. આ ઘટાડાથી લોકોને સામાન્ય રાહત મળશે તેવી આશા છે.

જોકે, તાપમાનમાં ઘટાડાની આગાહી છતાં રાજ્યના મોટાભાગના શહેરોમાં હજુ પણ ગરમીનો પ્રકોપ યથાવત છે. અનેક શહેરોમાં તાપમાનનો પારો ૪૦ ડિગ્રી સેલ્સિયસની ઉપર જ નોંધાઈ રહ્યો છે. 

અહેવાલ મુજબ અમદાવાદ શહેરમાં ગઈકાલે રાજ્યનું સૌથી વધુ ૪૩.૭ ડિગ્રી મહત્તમ તાપમાન નોંધાયું હતું, જેના કારણે અમદાવાદીઓ ભારે ગરમીથી શેકાયા હતા. આ ઉપરાંત સુરેન્દ્રનગરમાં ૪૩.૩ ડિગ્રી અને અમરેલીમાં ૪૨.૯ ડિગ્રી ગરમી નોંધાઈ હતી. સૌરાષ્ટ્ર અને ઉત્તર ગુજરાતના અન્ય શહેરો જેવા કે રાજકોટ, વડોદરા, ડીસા, ભુજ અને ભાવનગરમાં પણ હીટવેવ જેવી સ્થિતિ રહી હતી અને ગરમીનો પ્રકોપ યથાવત રહ્યો હતો. 

લોકોને આકરી ગરમીથી બચવા માટે સતત પ્રવાહી લેતા રહેવા અપીલ કરવામાં આવી છે.*