( ભરત શાહ દ્વારા ) નર્મદા :નર્મદા જિલ્લાના સાગબારા તાલુકાના ખોપી ગામે સાંસદ મનસુખભાઈ  વસાવાએ મુલાકાત લઈને જંગલ જમીનના ખેડાણના મુદ્દે ખેડૂતો સાથે બેઠક યોજી હતી. અંદાજે 10થી 12 ગામોના ખેડૂતો લાંબા સમયથી જંગલ જમીનના હક્ક માટે લડત ચલાવી રહ્યા છે. આ મુદ્દે હવે સાંસદ મનસુખ વસાવા પણ ખેડૂતોના સમર્થનમાં મેદાને ઉતર્યા છે.

બેઠક દરમિયાન સાંસદે ખેડૂતોને જંગલ જમીન સંબંધિત કાયદાઓ અંગે સમજ આપી હતી.
તેમણે જણાવ્યું કે વન વિભાગના કર્મચારીઓ સાથે કોઈપણ પ્રકારનું ઘર્ષણ કે અથડામણ ન કરવી, પરંતુ મહાત્મા ગાંધીના દર્શાવેલા અહિંસાના માર્ગે રહી પોતાના હક્ક માટે શાંતિપૂર્ણ લડત ચાલુ રાખવી. સાંસદ મનસુખભાઈ  વસાવાએ ખેડૂતોને વિશ્વાસ અપાવ્યો કે જ્યાં સુધી જંગલ જમીનના પ્રશ્નનો ઉકેલ નહીં આવે ત્યાં સુધી તેઓ ખેડૂતોની સાથે રહેશે. તેમણે કહ્યું કે, ભલે આ લડતમાં મને જેલમાં જવું પડે, તેમ છતાં હું ખેડૂતોનો સાથ નહીં છોડું. આ બેઠકમાં આ વિસ્તારના ખેડૂતો મોટી સંખ્યામાં ઉપસ્થિત રહ્યા હતા અને આગામી સમયમાં પણ આંદોલનને શાંતિપૂર્ણ રીતે આગળ વધારવાનો સંકલ્પ વ્યક્ત કર્યો હતો