સાબરકાંઠા : સાબરકાંઠા જિલ્લાના પ્રાંતિજ નેશનલ હાઈવે પર કાયદો અને વ્યવસ્થાના ધજાગરા ઉડાડતી એક અત્યંત ચોંકાવનારી ઘટના સામે આવી છે. ઓલપાડથી હિંમતનગર તરફ જઈ રહેલી રાજ્ય વાહન વ્યવહાર નિગમ (ST) ની ચાલતી બસને ઓવરબ્રિજ નજીક કેટલાક અસામાજિક તત્વોએ અચાનક રોકીને બસની અંદર ઘૂસી ગયા હતા. ચાર અજાણ્યા શખ્સોએ બસના ડ્રાઇવર તેમજ મહિલા કંડક્ટર પર અચાનક ઘાતકી હુમલો કરી દેતાં ભારે સન્સનાટી મચી ગઈ છે.

હાઇવે પર જાહેરમાં બનેલી આ હિંસક ઘટનાને પગલે બસમાં સવાર નિર્દોષ મુસાફરોમાં ચીસાચીસ અને ભયનો માહોલ સર્જાયો હતો. અચાનક થયેલા આ હુમલા પાછળ કોઈ જૂની અંગત અદાવત કે રોડ રેજ કારણભૂત છે કે કેમ તે અંગે હજુ સુધી સ્પષ્ટતા થઈ નથી. ઘટનાની જાણ થતાં જ સ્થાનીય પોલીસ તાત્કાલિક ઘટનાસ્થળે પહોંચી હતી અને મામલાની ગંભીરતાને ધ્યાને લઈને તપાસનો ધમધમાટ શરૂ કર્યો છે.

પોલીસ સૂત્રોના જણાવ્યા અનુસાર, હુમલાખોરોની ઓળખ મેળવવા માટે હાઇવે પરના સીસીટીવી કેમેરાના ફૂટેજ ચકાસવામાં આવી રહ્યા છે. પ્રાંતિજ પોલીસે ગુનો નોંધીને ફરાર આરોપીઓને ઝડપી પાડવા માટે અલગ-અલગ ટીમ બનાવીને ચક્રો ગતિમાન કર્યા છે. આ મામલે પ્રાથમિક તપાસ બાદ આરોપીઓની ધરપકડ અને હુમલા પાછળના મુખ્ય કારણો અંગે ટૂંક સમયમાં જ મોટા ખુલાસા થવાની શક્યતાઓ સેવાઈ રહી છે.