અમદાવાદ,તા.૨૯: મહેસૂલ ગુપ્તચર નિયામક કચેરીએ દેશવ્‍યાપી સોનાની દાણચોરીના સંગઠિત નેટવર્કનો પર્દાફાશ કરીને એક મુખ્‍ય સૂત્રધાર સહિત ૧૧ લોકોની ધરપકડ કરી છે. મુંબઈ, દિલ્‍હી, કોલકાતા, અમદાવાદ અને ગુવાહાટીમાં હાથ ધરાયેલી સંકલિત કાર્યવાહીમાં ૬.૬૧ કિલો વિદેશી સોનાની લગડીઓ જપ્ત થઈ હતી. જપ્ત સોનાની અંદાજિત કિમત ૧૦.૩૬ કરોડ રૂપિયા છે.

તપાસમાં વિદેશી સોનું ભારત બાંગ્‍લાદેશ સરહદ મારફતે લાવ્‍યા બાદ નાના પાર્સલોમાં વહેંચીને કુરિયર દ્વારા ગુવાહાટી અને કોલકાતાથી મુંબઈ, દિલ્‍હી તથા અમદાવાદ મોકલાતું હોવાનું સામે આવ્‍યું છે. કાગળ પર ઊભા કરાયેલા મોકલનાર અને મેળવનારના નામોનો ઉપયોગ થતો હતો. આ જાળાએ વર્ષના પ્રથમ નવ મહિનામાં આશરે ૩૧૮ કિલો અને અંદાજે ૪૭૫ કરોડ રૂપિયાનું દાણચોરીનું સોનું પહોંચાડ્‍યાનું તપાસમાં બહાર આવ્‍યું છે.