અમદાવાદના મકરબા રેલવે ઓવરબ્રિજની ડિઝાઇનમાં મોટી ખામીઓ સામે આવતાં અમદાવાદ મ્યુનિસિપલ કોર્પોરેશન (AMC) દ્વારા બ્રિજની ડિઝાઇન તૈયાર કરનાર ‘ડેલ્ફ કન્સલ્ટન્સી’ કંપનીને કારણદર્શક નોટિસ ફટકારવામાં આવી છે. તાજેતરમાં જ તૈયાર થયેલા આ બ્રિજના સુપર સ્ટ્રક્ચરમાં ક્ષતિઓ જણાતાં અને ટેકનિકલ ખામીઓના કારણે વાહનચાલકોની સુરક્ષા સામે સવાલો ઊભા થતાં તંત્ર એક્શનમાં આવ્યું છે. AMCએ આ મામલાને ગંભીરતાથી લઈને ડેલ્ફ કન્સલ્ટન્સી પાસે આ ડિઝાઇનિંગની બેદરકારી અંગે વિગતવાર ખુલાસો માગ્યો છે. આ નોટિસને પગલે બ્રિજની કામગીરી અને તેની ગુણવત્તા પર દેખરેખ રાખતી એજન્સીઓની ભૂમિકા સામે પણ મોટા સવાલો ઊભા થયા છે અને સમગ્ર શહેરમાં આ મુદ્દો ભારે ચર્ચાનો વિષય બન્યો છે.