પાલનપુરની સ્પેશિયલ NDPS કોર્ટ દ્વારા ડ્રગ્સ હેરાફેરીના એક વર્ષો જૂના કેસમાં આરોપી સમીર શેખને દોષિત ઠેરવીને 20 વર્ષની આકરી સજા અને ૨ લાખ રૂપિયાનો મોટો દંડ ફટકારવામાં આવ્યો છે.

આ ઘટના છ વર્ષ પહેલાની છે. ગુજરાત ATSની ટીમને  ચોક્કસ બાતમી મળી હતી કે પાલનપુર નજીકથી પસાર થતા એક શખ્સ દ્વારા મોટા પ્રમાણમાં ડ્રગ્સની હેરાફેરી કરવામાં આવી રહી છે. આ માહિતીના આધારે ATSએ પાલનપુર ટોલનાકા પાસે વોચ ગોઠવી હતી. તપાસ દરમિયાન શંકાસ્પદ રીતે પસાર થતા સમીર શેખને અટકાવી તેની સઘન તપાસ કરવામાં આવતા તેની પાસેથી પ્રતિબંધિત ડ્રગ્સનો જથ્થો મળી આવ્યો હતો.

તપાસમાં સામે આવ્યું હતું કે, આ ડ્રગ્સનો જથ્થો પંજાબના લુધિયાણાથી મંગાવવામાં આવ્યો હતો અને તેને મુંબઈ પહોંચાડવાનું મોટું નેટવર્ક કાર્યરત હતું. ડ્રગ્સની આ આંતરરાજ્ય હેરાફેરીમાં સમીર શેખ એક મહત્વની કડી હતો. પકડાયેલા જથ્થાની કિંમત અને તેની ગંભીરતાને જોતા પોલીસે NDPS એક્ટ હેઠળ કડક ગુનો નોંધીને ચાર્જશીટ દાખલ કરી હતી.

આ કેસમાં માત્ર સમીર શેખ જ નહીં, પરંતુ અન્ય એક આરોપી ફહીમ અઝીમબેગની પણ સંડોવણી હોવાનું તપાસમાં બહાર આવ્યું હતું. જોકે, ઘટના બાદથી ફહીમ અઝીમબેગ પોલીસ પકડથી દૂર રહ્યો છે અને લાંબા સમયથી ફરાર છે. કોર્ટે આ મામલાની ગંભીરતાને ધ્યાનમાં રાખીને ફહીમ અઝીમબેગ સામે પણ કડક વલણ અપનાવ્યું છે અને તેની સામે અટકાયતી વોરંટ જાહેર કર્યું છે.

આ ચુકાદાને ડ્રગ્સ માફિયાઓ માટે એક કડક ચેતવણી માનવામાં આવી રહી છે. કોર્ટે સજાની સાથે ૨ લાખ રૂપિયાનો દંડ ફટકારીને કાયદાનું પાલન કરાવવાની દિશામાં મજબૂત કદમ ઉઠાવ્યું છે. સરકારી વકીલની ધારદાર દલીલો અને ATS દ્વારા રજૂ કરવામાં આવેલા મજબૂત પુરાવાઓને આધારે કોર્ટે આરોપીને જેલના સળિયા પાછળ ધકેલી દીધો છે. આ ઘટના ફરી એકવાર સાબિત કરે છે કે ગુજરાતમાં ડ્રગ્સની હેરાફેરી કરનારા કોઈ પણ વ્યક્તિને બક્ષવામાં આવશે નહીં.