અમદાવાદ : અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી ગુરુવારે નાસિક જવા માટે રવાના થનારી ઇન્ડિગો એરલાઇન્સની ફ્લાઇટ છેલ્લી ઘડીએ અચાનક રદ કરવામાં આવતા મુસાફરો ભારે મુશ્કેલીમાં મુકાયા હતા અને એરપોર્ટ પર ભારે હંગામો મચાવ્યો હતો.

પ્રાપ્ત વિગતો અનુસાર, તમામ મુસાફરોનું બોર્ડિંગ પૂર્ણ થઈ ચૂક્યું હતું અને તેમનું લગેજ પણ વિમાનમાં જમા કરાવી દેવામાં આવ્યું હતું, પરંતુ તે જ સમયે અચાનક ટેકનિકલ કે અન્ય કારણોસર ફ્લાઇટ રદ થવાની જાહેરાત કરવામાં આવતા મુસાફરોમાં રોષ ફાટી નીકળ્યો હતો.

ગુસ્સે ભરાયેલા મુસાફરોએ એરલાઇન્સના સ્ટાફ સામે વિરોધ નોંધાવતા જણાવ્યું હતું કે છેલ્લી ઘડીએ આ પ્રકારે અચાનક ઉડાન રદ કરવાથી તેમનું આખું આયોજન બગડી ગયું છે અને તેમને ભારે હાલાકીનો સામનો કરવો પડી રહ્યો છે.

પરિસ્થિતિને કાબૂમાં લેવા માટે એરલાઇન્સના અધિકારીઓ દ્વારા પ્રભાવિત થયેલા મુસાફરોને સીધી ફ્લાઇટના બદલે વૈકલ્પિક વ્યવસ્થા તરીકે અમદાવાદથી મુંબઈ અને ત્યાંથી રોડ કે અન્ય માર્ગે નાસિક પહોંચાડવાનો પ્રસ્તાવ મૂકવામાં આવ્યો હતો.

જોકે, સીધી ફ્લાઇટના બદલે આટલી લાંબી અને અસુવિધાજનક મુસાફરીનો વિકલ્પ સ્વીકારવા તૈયાર ન હોય તેવા અનેક મુસાફરોએ એરલાઇન્સની આ વ્યવસ્થા સામે સખત નારાજગી વ્યક્ત કરી હતી અને વળતર અથવા તાત્કાલિક અન્ય સુવિધાની માંગ કરી હતી.
 

આ ઘટના બાદ એરપોર્ટ પર સુરક્ષાકર્મીઓ દ્વારા સ્થિતિ સંભાળવામાં આવી હતી અને એરલાઇન્સ પ્રશાસન દ્વારા ભવિષ્યમાં આવી અસુવિધા ન સર્જાય તે માટે યોગ્ય પગલાં લેવાની ખાતરી આપવામાં આવી હતી.