અમદાવાદ : ભારતની અતિ જાણીતી લોકગાયિકા અને હાલમાં જ રાજનીતિમાં નવો કીર્તિમાન સ્થાપિત કરનાર બિહારનાં અલીનગર મતવિસ્તારનાં યુવા ધારાસભ્ય સુશ્રી મૈથિલી ઠાકુરે આજે અમદાવાદ એરપોર્ટ પર ગુજરાતના મુખ્યમંત્રી શ્રી ભૂપેન્દ્ર પટેલની શુભેચ્છા મુલાકાત લીધી હતી. આ બેઠક દરમિયાન બંને મહાનુભાવો વચ્ચે હૂંફાળું વાતાવરણ જોવા મળ્યું હતું અને વિવિધ સાંસ્કૃતિક તથા સામાજિક વિષયો પર સકારાત્મક ચર્ચા થઈ હતી.

મૈથિલી ઠાકુર ભારતીય લોકસંગીત જગતમાં કોઈ પરિચયની મોથરાજી નથી ધરાવતા. ખાસ કરીને મિથિલા પ્રદેશની સમૃદ્ધ લોકસંગીત પરંપરા, છઠ્ઠ પૂજાના ગીતો અને મનમોહક ભક્તિગીતોની અનોખી પ્રસ્તુતિ દ્વારા તેમણે દેશ-વિદેશના લાખો શ્રોતાઓના હૃદયમાં વિશેષ સ્થાન બનાવ્યું છે. પોતાની સુમધુર ગાયકી અને લોકભોગ્ય અંદાજથી તેમણે ભારતીય લોકસંસ્કૃતિ અને પરંપરાગત સંગીતને વૈશ્વિક સ્તરે એક નવી ઓળખ અપાવી છે.

તેમની આ કલાત્મક સાધના અને દેશભરમાં ફેલાયેલા લોકપ્રિયતાને ધ્યાનમાં રાખીને વર્ષ ૨૦૧૯માં ભારત સરકાર દ્વારા તેમને પ્રતિષ્ઠિત ‘અટલ મિથિલા સન્માન’થી નવાજવામાં આવ્યા હતા. આ ઉપરાંત, વર્ષ ૨૦૨૪માં આયોજિત દેશના પ્રથમ ‘નેશનલ ક્રિએટર્સ એવોર્ડ’માં તેમને ‘કલ્ચરલ એમ્બેસેડર ઑફ ધ યર’ (Cultural Ambassador of the Year) ની ગરિમાપૂર્ણ શ્રેણીમાં સન્માનિત કરવામાં આવ્યાં હતાં, જે સમગ્ર દેશના યુવાનો માટે પ્રેરણારૂપ બની રહ્યું છે.

સંગીતના સૂર રેલાવ્યા બાદ કલા જગતમાંથી સીધા જ રાજકીય ક્ષેત્રે કદમ રાખનાર મૈથિલી ઠાકુરે વર્ષ ૨૦૨૫માં રાજકારણમાં પ્રવેશ કર્યો હતો. બિહાર વિધાનસભાની ચૂંટણીમાં તેમણે અલીનગર બેઠક પરથી ઝળહળતી જીત મેળવી હતી અને માત્ર નાની વયે જ બિહારનાં સૌથી નાની વયનાં ધારાસભ્ય બનવાનું ગૌરવ પ્રાપ્ત કર્યું હતું. લોકસેવા અને સાંસ્કૃતિક ઉત્થાનનો આ અનોખો સમન્વય તેમના વ્યક્તિત્વને વધુ પ્રભાવશાળી બનાવે છે.

અમદાવાદ એરપોર્ટ ખાતે મુખ્યમંત્રી શ્રી ભૂપેન્દ્ર પટેલ સાથે થયેલી આ શુભેચ્છા મુલાકાત ખૂબ જ સૌહાર્દપૂર્ણ વાતાવરણમાં સંપન્ન થઈ હતી. યુવા પ્રતિભાઓ અને કલાકારો પ્રત્યે ગુજરાત સરકારના આદરભાવને આ બેઠકે વધુ ઉજાગર કર્યો છે. મૈથિલી ઠાકુરની આ મુલાકાતથી રાજકીય અને સાંસ્કૃતિક વર્તુળોમાં ભારે ચર્ચા જાગી છે અને ચાહકોમાં પણ ઉત્સાહ જોવા મળ્યો છે.