મહેસાણા: સાબરમતી નદી પર આવેલા હીરપુરા બેરેજના ઉપરવાસમાં થઈ રહેલા ભારે વરસાદના કારણે જળસ્તરમાં સતત વધારો નોંધાઈ રહ્યો છે. બેરેજની માળખાકીય સલામતી અને જળસ્તરનું નિયંત્રણ જાળવવાના ભાગરૂપે વધારાનું પાણી સાબરમતી નદીમાં છોડવાની કામગીરી હાથ ધરવામાં આવી શકે છે. વડનગર સ્થિત સુજલામ સુફલામ પેટા વિભાગ-૩ ના નાયબ કાર્યપાલક ઇજનેરની કચેરી દ્વારા મળતી વિગતો મુજબ, ૨૬ જુલાઈ ૨૦૨૬ના રોજ બપોરે ૧૪:૦૦ થી ૧૫:૦૦ કલાકની આસપાસ જરૂરિયાત મુજબ બેરેજમાંથી પાણી છોડવામાં આવી શકે છે. આ સંભવિત જળ પ્રવાહને ધ્યાને રાખીને મહેસાણા અને સાબરકાંઠા જિલ્લાના નદી કાંઠાના ગામોને તાત્કાલિક અસરથી એલર્ટ કરી દેવામાં આવ્યા છે.

ઉપરવાસમાં ભારે વરસાદથી ૯૦૦ ક્યુસેક પાણીની સતત આવક:

છેલ્લા કેટલાક દિવસોથી, ખાસ કરીને ગત ૨૩ જુલાઈ ૨૦૨૬થી ઉપરવાસના વિસ્તારોમાં થઈ રહેલા નોંધપાત્ર વરસાદને પરિણામે હીરપુરા બેરેજમાં હાલમાં અંદાજે ૯૦૦ ક્યુસેક જેટલી પાણીની આવક નોંધાઈ રહી છે. જળસ્તરને સુરક્ષિત મર્યાદામાં રાખવા માટે નીચાણવાસમાં પાણી છોડવું અનિવાર્ય બન્યું છે. આ સ્થિતિને પગલે સંબંધિત તાલુકાના મામલતદાર અને એક્ઝીક્યુટીવ મેજીસ્ટ્રેટને તાત્કાલિક ધોરણે ગ્રામ્ય સ્તરે સંકલન સાધી આગોતરા સાવચેતીના પગલાં લેવા માટે વહીવટી તંત્ર દ્વારા તાકીદ કરવામાં આવી છે.

મહેસાણા અને સાબરકાંઠા જિલ્લાના ૮ ગામોને સતર્ક કરાયા:

હીરપુરા બેરેજમાંથી પાણી છોડાવાની શક્યતાને પગલે બેરેજના નીચાણવાસમાં આવતા મહેસાણા જિલ્લાના વિજાપુર તાલુકાના ૪ ગામો અને સાબરકાંઠા જિલ્લાના હિંમતનગર તાલુકાના ૪ ગામો મળી કુલ ૮ ગામોના લોકોને સાવચેત કરવામાં આવ્યા છે:

વિજાપુર તાલુકાના ગામો: હીરપુરા, ગણેશપુરા, જુનાસંઘપુર અને ધનપુરા.

હિંમતનગર તાલુકાના ગામો: દેરોલ, સરોલી, ગેડ અને વાગપુર.

નદીના પટમાં અવરજવર અને પ્રવૃત્તિઓ પર પ્રતિબંધ:

વહીવટી તંત્ર દ્વારા તમામ કાંઠાના ગામોના રહીશો, ખેડૂતો અને માછીમારોને નદીના પટ કે કિનારાના વિસ્તારોમાં અવરજવર ન કરવા સ્પષ્ટ સૂચના આપવામાં આવી છે. આ ઉપરાંત નદીના પાણીમાં પશુઓને લઈ જવા, સ્નાન કરવું, કપડાં ધોવા કે માછીમારી કરવા જેવી કોઈપણ પ્રવૃત્તિ માટે નદીમાં ઉતરવા પર સુરક્ષાના કારણોસર સખત મનાઈ ફરમાવવામાં આવી છે.