અમદાવાદમાં ભગવાન જગન્નાથજીની 149મી રથયાત્રાને લઇને તડામાર તૈયારીઓ શરૂ કરી દેવામાં આવી છે. જમાલપુર સ્થિત જગન્નાથ મંદિરથી આગામી અષાઢી બીજના દિવસે ભગવાનની રથયાત્રા નીકળશે. મંદિર પ્રશાસન દ્વારા ત્રણેય મુખ્ય રથોના ફિટનેસ ચેકિંગ અને કલરકામ સાથે રથયાત્રા પૂર્વે યોજાનારી જળયાત્રાના આયોજનને આખરી ઓપ આપવામાં આવી રહ્યો છે.

રથના સમારકામ અને મજબૂતીની ચકાસણી ભગવાન જગન્નાથ, ભાઈ બળદેવ અને બહેન સુભદ્રાના ત્રણેય રથો નંદીઘોષ, તાલધ્વજ અને પદ્મધ્વજને મંદિર પરિસરમાં લાવવામાં આવ્યા છે. રથના પૈડાં, ધરી અને લાકડાના માળખાની મજબૂતીની ઝીણવટભરી તપાસ કરવામાં આવી રહી છે. રથયાત્રા દરમિયાન કોઈ પણ પ્રકારની ટેકનિકલ ખામી ન સર્જાય તે માટે વ્હીલ એલાઈનમેન્ટ અને બ્રેકિંગ સિસ્ટમનું પરીક્ષણ કરાયું છે.

નગરચર્યા વખતે રથ ભવ્ય દેખાય એ માટે ત્રણેય રથો પર નવા રંગરોગાનની કામગીરી ચાલી રહી છે. રથયાત્રા પૂર્વે પરંપરાગત જળયાત્રા આગામી જેઠ સુદ પૂનમના દિવસે યોજાશે. આ દિવસે સાબરમતી નદીના કિનારેથી કળશમાં જળ ભરીને લાવવામાં આવશે. આ પવિત્ર જળથી ભગવાનનો જળાભિષેક કરવામાં આવશે.જળાભિષેક બાદ ભગવાન 15 દિવસ માટે મોસાળ સરસપુર જશે.

તંત્ર અને પોલીસ એક્શન મોડમાં આ વર્ષે રથયાત્રામાં લાખો ભક્તો ઉમટી પડવાની શક્યતાને જોતા પોલીસ વિભાગ અને અમદાવાદ મ્યુનિસિપલ કોર્પોરેશન સજ્જ બન્યું છે. ગૃહ વિભાગના ઉચ્ચ અધિકારીઓ અને મંદિર ટ્રસ્ટ વચ્ચે સુરક્ષા વ્યવસ્થાને લઈને બેઠકોનો દોર શરૂ થયો છે.યાત્રાના રૂટ પર આવતા જર્જરિત મકાનોનું સર્વે અને રસ્તાઓના સમારકામની કામગીરી કોર્પોરેશન દ્વારા હાથ ધરવામાં આવી છે.

કોમી એકતાના પ્રતીક સમાન આ યાત્રા શાંતિપૂર્ણ માહોલમાં સંપન્ન થાય તે માટે સમગ્ર રૂટ પર સીસીટીવી કેમેરા અને ડ્રોન દ્વારા દેખરેખ રાખવાનું આયોજન છે. ભગવાનના નવા વાઘા અને આભૂષણો ભગવાન જગન્નાથજી માટે આ વર્ષે ખાસ પ્રકારના રેશમી વાઘા તૈયાર કરવામાં આવી રહ્યા છે. ભગવાનના પોશાક અને ઘરેણાંને આકર્ષક લુક આપવા માટે નિષ્ણાત કારીગરો દિવસ-રાત મહેનત કરી રહ્યા છે. મંદિર પરિસરમાં અત્યારથી જ 'જય જગન્નાથ'ના નાદ સાથે ભક્તિમય માહોલ જામી રહ્યો છે.